ԵԱՏՄ երկրներ կանխիկ ռուբլու արտահանման սահմանափակումներն այսօրվանից ուժի մեջ են մտել:
Ավելի վաղ համապատասխան հրամանագիրը ստորագրել էր Ռուսաստանի Դաշնության նախագահ Վլադիմիր Պուտինը։
Փաստաթուղթը սահմանում է արգելք՝ ֆիզիկական անձանց կողմից ԵԱՏՄ երկրներ կանխիկ ռուբլու արտահանման նկատմամբ՝ ԿԲ-ի գործող փոխարժեքով 100 հազար դոլարին համարժեք գումարից սկսած։ Իրավաբանական անձինք և անհատ ձեռնարկատերերը ապրիլից չեն կարող արտահանել ռուսական արժույթը՝ անկախ գումարի չափից։
Բացառություն է նախատեսված՝ ՌԴ կառավարության կողմից սահմանված միջազգային օդանավակայաններով արտահանման դեպքում՝ որոշակի փաստաթղթերի առկայությամբ։
Քաղաքացիները պետք է իրենց մոտ ունենան փաստաթուղթ, որը հաստատում է արժույթի փոխանակումը ռուբլու, կամ փաստաթուղթ՝ բանկոմատից կամ վճարային տերմինալից կանխիկ ռուբլու տրամադրման վերաբերյալ։ Եթե խոսքը վերաբերում է կանխիկ ձևով վարկերին կամ փոխառություններին, անհրաժեշտ կլինի վարկային կամ փոխառության պայմանագիր, ինչպես նաև ծախսային դրամարկղային օրդեր, որը տրված է ֆինանսական կազմակերպության կամ բանկի կողմից։
«Խոսքը պարտադիր հայտարարագրման մասին չէ, այլ կանխիկ ձևով նշանակալի գումարի ծագման պատշաճ հաստատման մասին», – ավելի վաղ նշել էր ֆինանսների նախարարությունը։
Միջազգային օդանավակայանների ցանկում, որոնց միջոցով կարող է իրականացվել միջոցների արտահանումը, ընդգրկվել է 17 օդային նավահանգիստ:
ԵԱՏՄ կազմում, բացի Ռուսաստանից, ընդգրկված են Հայաստանը, Բելառուսը, Ղազախստանը և Ղրղզստանը։