Ըստ ԱՊԱ գործակալության՝ ԱՄՆ հատուկ բանագնաց Սթիվ Ուիթքոֆը, Դավոսում ընթացող Համաշխարհային տնտեսական ֆորումի շրջանակներում կազմակերպված պանելային քննարկման ժամանակ հայտարարել է, որ Ուկրաինայում խաղաղության գործընթացն արդեն մտել է իր վերջնական փուլ, և բանակցությունները ներկայումս կենտրոնացած են միայն մեկ հիմնական հարցի լուծման վրա։
Նա նշել է, որ կողմերը քննարկել են այս հարցի վերաբերյալ մի քանի տարբերակ, ինչը ցույց է տալիս, որ լուծումը հնարավոր է։
«Եթե երկու կողմերն էլ անկեղծորեն ցանկանում են լուծել այս հարցը, դա անպայման տեղի կունենա», – ընդգծել է նա։
ԱՄՆ նախագահի հատուկ ներկայացուցիչը հաստատել է, որ հունվարի 22-ի երեկոյան կմեկնի Մոսկվա։ Նա ասել է, որ Մոսկվա կատարած այցից հետո կմեկնի Աբու Դաբի, որտեղ կանցկացնի աշխատանքային խմբի հանդիպումներ Ուկրաինայի հարցով։
Ուիթքոֆը նշել է, որ ԱՄՆ-ն վճռական է ուկրաինական հակամարտությունը հաջողությամբ լուծելու հարցում և կշարունակի դիվանագիտական ջանքերը այս ուղղությամբ։