Մարտի 10-ին Փարիզում ՀՀ արտաքին գործերի նախարար Արարատ Միրզոյանը հանդիպումներ է ունեցել ԱՄՆ պետքարտուղարի սպառազինությունների վերահսկման և միջազգային անվտանգության հարցերով տեղակալ Թոմաս Դինանոյի, ինչպես նաև Ֆրանսիայի Եվրոպայի և արտաքին գործերի նախարար Ժան-Նոել Բարոյի հետ։ Զրույցների ընթացքում քննարկվել են ՀՀ-ԱՄՆ և ՀՀ-Ֆրանսիա ռազմավարական գործընկերության խորացման հարցեր՝ ընդգծելով համագործակցության կարևորությունը տարբեր ոլորտներում։
Միրզոյանն ու Դինանոն գոհունակությամբ նշել են միջուկային էներգիայի խաղաղ նպատակներով օգտագործման ոլորտում համագործակցության մասին համաձայնագրի բանակցությունների ավարտը, ընդգծելով դրա ստորագրման և հետագա փոխգործակցության պատրաստակամությունը։ Հանդիպման ընթացքում անդրադարձ է կատարվել նաև տարածաշրջանային ենթակառուցվածքային ծրագրերին և փոխադարձ հետաքրքրություն ներկայացնող այլ հարցերի։
Ֆրանսիայի նախարար Ժան-Նոել Բարոյի հետ զրույցում առանձնացվել են էներգետիկայի և ենթակառուցվածքների ոլորտներում համագործակցության ծրագրերը, ինչպես նաև մայիսին Երևանում կայանալիք Եվրոպական քաղաքական համայնքին ընդառաջ տարվող աշխատանքները։ Միրզոյանը և Բարոն քննարկել են Մերձավոր Արևելքում զարգացումները՝ ընդգծելով տարածաշրջանային կայունության ապահովման կարևորությունը և ժողովրդավարական դիմակայունության ամրապնդման ուղղությամբ շարունակական փոխգործակցությունը։