Ռուսաստանն ու Վրաստանը կարգավորում են հարաբերությունները, հանդիպում է տեղի ունեցել Մինսկում

Բելառուսի մայրաքաղաք Մինսկում ռուս-վրացական հարաբերությունների կարգավորմանն ուղղված հարցեր են քննարկվել Ռուսաստանի և Վրաստանի ներկայացուցիչների միջև։ Այդ մասին ՌԴ ԱԳՆ պաշտոնական կայքից ենք տեղեկանում։

 

Ռուսական կողմի պաշտոնական հաղորդագրության համաձայն՝ հանդիպումը կայացել է ՌԴ ԱԳ փոխնախարար Միխայիլ Գալուզինի և Ռուսաստանի Դաշնության հետ հարաբերությունների գծով Վրաստանի վարչապետի հատուկ ներկայացուցիչ, Վրաստանի ԱԳ փոխնախարար Գեորգի Զուրաբաշվիլիի միջև՝ վերսկսված ռուս-վրացական ուղիղ երկխոսության շրջանակներում։

 

«Մտքերի հանգամանալից փոխանակում է տեղի ունեցել երկկողմ հարաբերություններին վերաբերող արդիական հարցերի շուրջ՝ շեշտադրելով առևտրատնտեսական, մշակութային և հումանիտար համագործակցությունը։ 

 

Ձեռք են բերվել մի շարք գործնական պայմանավորվածություններ։

 

Քննարկվել են տարածաշրջանային անվտանգությանը վերաբերող հարցեր։

 

Պատվիրակությունների ղեկավարները երախտագիտություն են հայտնել բելառուսական կողմին՝ ռուս-վրացական կողմերի հանդիպման կազմակերպման հարցում ցուցաբերած աջակցության համար։

 

Պայմանավորվածություն է ձեռք բերվել շարունակել շփումները՝ Ռուսաստանի և Վրաստանի միջև հարաբերությունների հետագա զարգացման նպատակով»,- նշված է ՌԴ ԱԳՆ պաշտոնական հաղորդագրությունում։

Leave a comment