Բնական կամ հեղուկացված նավթային գազով աշխատող տրանսպորտային միջոցների վրա տեղադրված գազաբալոնները ենթակա են պարտադիր պարբերական վկայագրման. տեսչական մարմին

Բնական կամ հեղուկացված նավթային գազով աշխատող տրանսպորտային միջոցների վրա տեղադրված գազաբալոնները ենթակա են պարտադիր պարբերական վկայագրման. տեսչական մարմին

ՀՀ քաղաքաշինության, տեխնիկական և հրդեհային անվտանգության տեսչական մարմինը (այսուհետ՝ Տեսչական մարմին) հիշեցնում է տրանսպորտային միջոցների սեփականատերերին և վարորդներին, որ սեղմված բնական կամ հեղուկացված նավթային գազով աշխատող տրանսպորտային միջոցների վրա տեղադրված գազաբալոնները ենթակա են պարտադիր պարբերական վկայագրման։

««Ավտոմոբիլային տրանսպորտի մասին» օրենքի 𝟐𝟔.𝟏-ին հոդվածի 𝟑-րդ մասի համաձայն՝ «Շահագործման մեջ գտնվող գազաբալոնները ենթակա են պարտադիր վկայագրման»։

Միաժամանակ, նույն հոդվածի 𝟏-ին մասի համաձայն՝ գազաբալոնների պարբերական վկայագրումն իրականացնում են բացառապես «Լիցենզավորման մասին» Հայաստանի Հանրապետության օրենքով սահմանված համապատասխան լիցենզիա ունեցող կազմակերպությունները և անհատ ձեռնարկատերերը։

Գազաբալոնների պարբերական վկայագրման կարգը և պարբերականությունը սահմանված են ՀՀ կառավարության 𝟐𝟎𝟐𝟏 թվականի դեկտեմբերի 𝟗-ի թիվ 𝟐𝟎𝟏𝟏-Ն որոշմամբ։ Նշված որոշման հավելվածի 𝟐𝟐-րդ կետի համաձայն՝ գազաբալոնների պարբերական վկայագրումն իրականացվում է հետևյալ պարբերականությամբ՝

  • լեգիրացված (համաձուլված) պողպատից պատրաստված 𝟏-ին տիպի գազաբալոնների համար՝ 𝟑 տարին մեկ անգամ, եթե առկա է արտադրողի՝ պողպատի լեգիրացված լինելը հավաստող փաստաթուղթ, իսկ դրա բացակայության դեպքում՝ 𝟐 տարին մեկ անգամ,
  • ածխածնային պողպատից պատրաստված 𝟏-ին տիպի, 𝟐-𝟒-րդ տիպերի և հեղուկացված նավթային գազաբալոնների համար՝ 𝟐 տարին մեկ անգամ։
  • Գազաբալոնների պարբերական վկայագրման գործընթացը ներառում է դրանց տեխնիկական վիճակի ստուգում, համապատասխան փորձարկումների իրականացում, ինչպես նաև գազավառելիքային սնման համակարգի ճնշափորձարկում։

Հարկ է ընդգծել, որ սահմանված ժամկետներում գազաբալոնների պարբերական վկայագրում չիրականացնելը կարող է վտանգել տրանսպորտային միջոցի անվտանգ շահագործումը՝ հնարավոր վտանգ ստեղծելով ինչպես վարորդի և ուղևորների, այնպես էլ ճանապարհային երթևեկության մյուս մասնակիցների համար։

Հաշվի առնելով վերոգրյալը՝ Տեսչական մարմինը հորդորում է տրանսպորտային միջոցների սեփականատերերին և վարորդներին հետևել գազաբալոնների հերթական վկայագրման ժամկետներին և ժամանակին իրականացնել պարտադիր վկայագրումը՝ օգտվելով բացառապես համապատասխան լիցենզիա ունեցող տնտեսավարող սուբյեկտների ծառայություններից։

Գազաբալոնների պարբերական վկայագրում իրականացնելու համապատասխան լիցենզիա ունեցող տնտեսավարող սուբյեկտների ցանկը հրապարակված է լիազոր մարմնի պաշտոնական կայքում և հասանելի է հետևյալ հղմամբ՝ 

 https://api.mtad.am/…/14_12-43-sc1065-6aa7b3bdc7337.pdf»,- հայտնել են ընկերությունից: 

Leave a comment