Հասարակություն
10.11.2026 | 14:16
«Ցավոք սրտի, նման դեպքեր տեղի են ունենում ինչպես ամբողջ աշխարհում, այնպես էլ քրեակատարողական հիմնարկներում»,- անդրադառնալով առավոտյան «Նուբարաշեն» ՔԿՀ-ում մահացած «Ուժեղ Հայաստան» կուսակցության Ստեփանավան համայնքի ղեկավարի թեկնածու առաջադրված Արսեն Գևորգյանի դեպքին՝ ասաց արդարադատության նախարար Սրբուհի Գալյանը։
Ներկայացնելով դեպքի հանգամանքները՝ նախարարը տեղեկացրեց, որ կալանավորված անձը հիմնարկում գտնվելու ողջ ընթացքում առողջական խնդիրների կամ ինքնազգացողության վատացման վերաբերյալ գանգատներ չի ունեցել․ «Գանգատը եղել է միայն դեպքի օրը՝ վաղ առավոտյան։ Ժամը 07:55-ի սահմաններում նրան այցելել է բուժակը և կատարել առաջնային զննություն։ Կարճ ժամանակ անց կանչվել է շտապօգնություն, որից հետո արձանագրվել է սրտի կանգ»։
Արձագանքելով քրեակատարողական հիմնարկներում մահացության ցուցանիշների մասին դիտարկմանը՝ Գալյանը նշեց, որ եթե նախորդ տարվա ընթացքում գրանցվել էր մահվան ավելի քան 20 դեպք, ապա ընթացիկ տարում՝ տարեվերջի դրությամբ, սա 4-րդ դեպքն է։ Նրա խոսքով՝ լինում են իրավիճակներ, երբ առողջական խնդիրներ ունեցող կամ ձեռք բերող անձինք հայտնվում են անազատության մեջ։
Լրագրողի հարցին, թե ընդդիմադիր շրջանակները տեղի ունեցածի համար մեղադրում են իշխանություններին՝ շեշտելով քաղաքական դրդապատճառներով կալանավորումները, Գալյանը հակադարձեց․ «Մենք միշտ ասում ենք, և ճշմարտությունն այնպիսին է, որ քաղաքական հետապնդումներ չեն իրականացվում։ Ենթադրյալ կատարված արարքներին պետությունը միշտ պետք է տա պատշաճ արձագանք։ Դա պետության գործառույթն է՝ հետևել հանցագործություններին և դրանց բացահայտմանը»։
Մանրամասները՝ տեսանյութում։
Ռոզա Վարդանյան