Այսօր Երևանում տեղի կունենա COP17-ի բացման պաշտոնական արարողությունը

ԵՐԵՎԱՆ, 18 հոկտեմբերի․ /Նովոստի–Արմենիա/․ Երևանում կիրակի՝ հոկտեմբերի 18-ին, տեղի կունենա ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովի (COP17) բացման պաշտոնական արարողությունը։

Համաժողովի ծրագրի համաձայն՝ բացման արարողությունը նախատեսված է Երևանի ժամանակով ժամը 17։30-ին։ COP17-ի հիմնական նիստերը կանցկացվեն հոկտեմբերի 19–30-ը։

Համաժողովի ընթացքում ՄԱԿ-ի Կենսաբազմազանության մասին կոնվենցիայի մասնակից պետությունների ներկայացուցիչները կքննարկեն բնության պահպանության, էկոհամակարգերի վերականգնման և անհետացման վտանգի տակ գտնվող կենդանիների ու բույսերի տեսակների պաշտպանության ոլորտում միջազգային պարտավորությունների կատարումը։

Առանցքային թեմաներից մեկը կլինի 2022 թվականին ընդունված Կունմին-Մոնրեալի կենսաբազմազանության գլոբալ շրջանակի իրականացման առաջին համաշխարհային գնահատումը։ Փաստաթուղթը նախատեսում է մինչև 2030 թվականը հասնել 23 գլոբալ նպատակների, այդ թվում՝ ապահովել մոլորակի ցամաքային և ծովային տարածքների առնվազն 30%-ի պահպանությունը։

Առանձնահատուկ ուշադրություն է նախատեսվում դարձնել բնապահպանական միջոցառումների համար ֆինանսական ռեսուրսների մոբիլիզացմանը, մասնավոր ներդրումների ներգրավմանը և միջազգային համագործակցության ընդլայնմանը։

COP17-ին ընդառաջ՝ հոկտեմբերի 15–16-ին Երևանում անցկացվել է Կենսաբազմազանության հարցերով առաջնորդների գագաթնաժողովը, որի արդյունքներով ընդունվել է «Գործողություններ՝ հանուն բնության» երևանյան հռչակագիրը։

Համաժողովի մասին

COP17-ը ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովն է, որը միավորում է պետություններին՝ կենսաբազմազանության պահպանման և բնական ռեսուրսների կայուն օգտագործման ուղղությամբ համատեղ միջոցառումներ մշակելու նպատակով։

Հայաստանն առաջին անգամ է հյուրընկալում նման մասշտաբի համաժողով և երկու տարի՝ մինչև 2028 թվականի հաջորդ համաժողովը, նախագահելու է COP17-ը։