ԱՄՆ բանակի նախկին մայոր Նիդալ Մալիք Հասանի մահապատիժը, որը 2009 թվականին Ֆորտ Հուդ ռազմաբազայում սպանել էր 13 մարդու, կհեռարձակվի ուղիղ եթերում։ Այս մասին հաղորդում է Reuters գործակալությունը՝ հղում անելով Պենտագոնի ներկայացուցչին, գրում է DW-ի ռուսական ծառայությունը։
Գնդակահարության միջոցով մահապատիժը տեղի կունենա դեկտեմբերի 3-ին՝ Թեխաս նահանգի Ֆորտ Հուդ ռազմաբազայում։ Reuters-ը նշում է, որ 1945 թվականից ի վեր Հասանը կլինի առաջին դատապարտյալը, որին ԱՄՆ զինված ուժերը մահապատժի կենթարկեն գնդակահարության միջոցով։
«Իմ սրտով է այն մոտեցումը, որն ունեինք Երկրորդ համաշխարհային պատերազմի ժամանակ»,- հայտարարել է ԱՄՆ պատերազմի նախարար Փիթ Հեգսեթը։
56-ամյա Հասանին գնդակահարության միջոցով մահապատժի ենթարկելու առաջարկը ներկայացրել է հենց Հեգսեթը, իսկ ԱՄՆ նախագահ Դոնալդ Թրամփը աջակցել է դրան։
Ըստ AFP-ի՝ Հեգսեթը հարցազրույցներից մեկում հայտարարել էր, որ Հասանին սպասում է «զինվորների կողմից գնդակահարություն, և մենք կապահովենք, որ մահապատիժը հրապարակային լինի, և մարդիկ կարողանան դա տեսնել»։
Ծագումով պաղեստինցի ԱՄՆ քաղաքացի Նիդալ Հասանը 2009 թվականի նոյեմբերի 5-ին «Ալլահ աքբար» գոչելով՝ կրակ է բացել Ֆորտ Հուդ ռազմաբազայում անզեն ծառայակիցների վրա, որոնք հավաքվել էին բուժզննում անցնելու համար։ Պատասխան կրակով Հասանը վիրավորվել էր, այդ ժամանակից նրա ոտքերը կաթվածահար են։ Ռազմական բժիշկն իր գործողությունները բացատրել է Աֆղանստանում մուսուլմաններին ամերիկացի զինվորներից պաշտպանելու ցանկությամբ։
2013 թվականին մայոր Հասանը մեղավոր է ճանաչվել իրեն առաջադրված մեղադրանքի բոլոր 32 կետերով։ Չորս ժամ տևած խորհրդակցությունից հետո ռազմական տրիբունալը միաձայն նրան դատապարտել է մահապատժի։ Դատարանը հիմնավորված է համարել այն փաստը, որ հանցագործությունը ներշնչված է եղել Ալ-Քաիդայի գաղափարախոսությամբ։
Նիդալ Հասանը վճիռը լսել է բացարձակ հանգստությամբ։ Դատավարության ընթացքում նա երբեք չի վիճարկել իր մեղավորությունը, հրաժարվել է փաստաբաններից և ինքն է պաշտպանել իրեն, թեև դատարանին չի ներկայացրել իր օգտին որևէ վկայի կամ ապացույց։ Օրենքի համաձայն՝ նրան հարկադրաբար նշանակված փաստաբանները կարծիք են հայտնել, որ Հասանը միտումնավոր ձգտել է հասնել մահապատժի դատավճռի։ Այդ ժամանակից ի վեր նա պահվում է Կանզաս նահանգի ռազմական բանտում։
2025 թվականի սկզբին Թրամփի՝ Սպիտակ տուն վերադառնալուց հետո ԱՄՆ-ում մահապատժի դատավճիռների իրականացված դեպքերի թիվը կտրուկ աճել է, գրում է AFP-ն։ Դատավճռի կատարման՝ գնդակահարության եղանակը թույլատրված է հինգ նահանգում։
Թարգմանությունը՝ Էմմա Չոբանյանի