Եվրոպական միության երկրները պատրաստվում են միության ընդհանուր բյուջեի 100–200 միլիարդ եվրոյի չափով կրճատմանը։ Այս մասին հայտնել է Politico-ն՝ վկայակոչելով եվրոպացի դիվանագետների։
Ըստ պարբերականի՝ Իռլանդիան, որը ներկայումս նախագահում է ԵՄ խորհուրդը և համակարգում է բանակցային գործընթացը, հոկտեմբերի 10-ին կներկայացնի բյուջեի վերաբերյալ իր առաջարկը։ Դրանով Դուբլինը հիմք կստեղծի բարդ քննարկումների համար, որոնք տեղի կունենան միության ղեկավարների միջև առաջիկա գագաթնաժողովի ընթացքում։
«ԵՄ կառավարություններն ակնկալում են, որ միության հաջորդ յոթնամյա բյուջեի առաջարկվող ծավալը կկրճատվի 100–200 միլիարդ եվրոյով՝ համեմատած հունիսին ներկայացված ծրագրի հետ», – նշվում է հոդվածում։
Դիվանագետները նշել են, որ ԵՄ-ում տարաձայնություններ են առաջացել՝ անդամ երկրներին բաժանելով երկու հակադիր ճամբարի։ Գերմանիայի, Ավստրիայի և Նիդերլանդների գլխավորությամբ հանդես եկող «խնայող» երկրները պնդում են բյուջեի (որի ընդհանուր ծավալը կազմում է մոտ 2 տրիլիոն եվրո) զգալի կրճատման անհրաժեշտությունը, մինչդեռ հարավային և արևելյան պետությունների կոալիցիան, որը հայտնի է որպես «Համախմբման բարեկամներ», դեմ է նման կրճատումներին։
Ակնկալվում է, որ իռլանդական առաջարկը, որպես «գերմանական ճամբարի» նկատմամբ բարի կամքի դրսևորում, այնուամենայնիվ, կներառի երաշխիքներ, որոնք կպաշտպանեն գյուղատնտեսության և տարածաշրջանային զարգացման ծախսերը զանգվածային կրճատումներից։ Սա կծառայի որպես զիջում «Համախմբման բարեկամներին»։
ԵՄ երկրները նպատակ ունեն ավարտին հասցնել բանակցությունները մինչև 2027 թվականը՝ գործընթացն ավարտելով նախքան Ֆրանսիայում, Լեհաստանում և Իտալիայում կայանալիք ընտրությունները։