Իսրայելի վարչապետ Բենյամին Նեթանյահուն հանձնարարել է միջգերատեսչական խմբին և Միջազգային իրավունքի վարչության տնօրենին սկսել Միջազգային քրեական դատարանում (ՄՔԴ) Թուրքիայի նախագահ Ռեջեփ Թայիփ Էրդողանի դեմ դատական գործի նախապատրաստում, հայտնել է i24News-ը։
Գործը հիմնականում կենտրոնանալու է Թուրքիայում քրդական փոքրամասնությունների դեմ թուրքական անվտանգության ուժերի գործողությունների վրա, ինչպես նաև անդրադառնալու է Էրդողանի կառավարության կողմից պաղեստինյան արմատական «Համաս» շարժման ֆինանսավորմանը։
Իսրայելը չի ճանաչում ՄՔԴ-ի իրավասությունը՝ չստորագրելով Հռոմի կանոնադրությունը. Թուրքիան նույնպես այն չի ստորագրել։ Հեռուստաալիքը նշել է, որ բողոքը ներկայացնելու համար կարող է միջնորդ ներգրավվել։
i24News-ի աղբյուրները նշել են, որ Իսրայելը հույս ունի, որ հայցը փաստացի ներկայացնելու անհրաժեշտություն չի առաջանա՝ փոխարենը մտադիր լինելով օգտագործել դրա սպառնալիքը որպես լծակ Էրդողանի դեմ։ Նեթանյահուն և Արդարադատության նախարարության պաշտոնյաները հրաժարվել են մեկնաբանություններ տալ հեռուստաալիքի հարցմանն ի պատասխան։
Օգոստոսի 21-ին Թուրքիայի արդարադատության նախարարությունը Ինտերպոլից պահանջել է «Կարմիր ծանուցում» (Red Notice) հրապարակել Նեթանյահուի և Իսրայելի ռազմածովային ուժերի հրամանատար Աֆեկ Մոսկովիչի նկատմամբ։ Պահանջը կապված էր միջազգային ջրերում միջազգային «Սումուդ» նավատորմի ակտիվիստների վրա հարձակման գործի հետ։ Մեղադրանքները ներառում են մարդկության դեմ հանցագործություններ, ցեղասպանություն, ծանրացուցիչ հանգամանքներում ազատազրկում, դիտավորյալ մարմնական վնասվածքների հասցում, խոշտանգումներ, գույքին վնաս պատճառել և կողոպուտ։ Ինտերպոլի «կարմիր ծանուցումն» ըստ էության ձերբակալման միջազգային պահանջ է։