ՀՀ առողջապահության նախարարության «Առողջապահական ծրագրերի իրականացման գրասենյակի» (ԾԻԳ) աշխատավարձերի վճարման համար մինչև տարեվերջ պակասում է 50,934 մլն դրամ։ Կառավարությունը որոշեց անհրաժեշտ գումարն ապահովել ԱՆ ներսում բյուջետային միջոցների վերաբաշխման միջոցով։
-
Բյուջեի ճեղքվածքը. 2026 թվականի համար ԾԻԳ-ի տարեկան բյուջեն հաստատվել էր 105,5 մլն դրամ, մինչդեռ կանխատեսվող տարեկան ծախսերը կազմում են մոտ 162,4 մլն դրամ։
-
Փաստացի ծախսերը. Սեպտեմբերի 4-ի դրությամբ արդեն ծախսվել է 89,2 մլն դրամ (տարեկան բյուջեի 84,4%-ը)։
-
Աշխատավարձերի դեֆիցիտը. 2026թ․ աշխատանքի վարձատրության համար նախատեսվել էր ընդհանուր 81,3 մլն դրամ, սակայն փաստացի ամսական վարձատրությունը կազմում է մոտ 11,4 մլն դրամ։ Հունվար-օգոստոսի վճարումներից հետո մնացած ամիսների միջոցներն այլևս չեն բավարարում։
-
Ժամանակավոր լուծումները. Խնդիրը մեղմելու համար գրասենյակի պահպանման այլ ծախսերից արդեն 10 մլն դրամ էր վերաբաշխվել աշխատավարձերին։
-
Գրասենյակի գործառույթները. 20 հաստիք ունեցող ԾԻԳ-ը համակարգում է առողջապահական հաստատությունների կապիտալ շինարարությունը, ինչպես նաև Համաշխարհային բանկի, Ասիական զարգացման բանկի և այլ միջազգային կառույցների ծրագրերը։
Ինչու է դա կարևոր Գործող միջազգային վարկային ծրագրերով ԾԻԳ-ի գործառնական ծախսերը (այդ թվում՝ աշխատավարձերը) նախատեսված չեն և ամբողջությամբ ֆինանսավորվում են պետբյուջեից։ Նախարարության ներսում վերաբաշխումը կանխում է առողջապահական խոշոր կապիտալ ու միջազգային ծրագրերի համակարգման հնարավոր կանգը։