Ռուսաստանում ընթանում է Պետդումայի պատգամավորների ընտրությունների երկրորդ օրվա քվեարկությունը։ Այն տևելու է երեք օր:
ՌԴ ԿԸՀ տվյալներով՝ սեպտեմբերի 19-ի Մոսկվայի ժամանակով ժամը 13:30-ի դրությամբ ընդհանուր մասնակցությունը կազմում է 32,51 տոկոս: Էլեկտրոնային քվեարկության դաշնային համակարգի օգնությամբ քվեարկել է ավելի քան 3,15 միլիոն ընտրող 4,04 միլիոն գրանցված մասնակիցներից կամ 78,21%-ը: Կենտրոնական ընտրական հանձնաժողովի ղեկավար Էլլա Պամֆիլովան սեպտեմբերի 19-ի առավոտյան հայտարարել է, որ էլեկտրոնային քվեարկության համակարգի աշխատանքում գրեթե խափանումներ չեն եղել:
Վաղաժամկետ էլ քվեարկել է ավելի քան 4,6 միլիոն ռուսաստանցի՝ հայտնել է Պամֆիլովան։
Արտերկրում գտնվող ՌԴ քաղաքացիների քվեարկության համար ստեղծվել է 333 տեղամաս։ Դրանք գործում են 152 երկրում, որոնց մեծ մասում՝ միայն քվեարկության միասնական օրը՝ սեպտեմբերի 20-ին։
ԿԸՀ-ն ավելի վաղ հայտնել է, որ հուլիսի 1-ի դրությամբ Ռուսաստանում բնակվում էր մոտ 111 միլիոն ընտրող, արտերկրում՝ ավելի քան 1,8 միլիոն մարդ:
Պետդումայի ընտրություններն անցկացվում են խառը համակարգով. 225 պատգամավոր կընտրվի կուսակցական ցուցակներով, ևս 225-ը՝ միամանդատ ընտրատարածքներով: Խորհրդարանի ստորին պալատի նոր կազմի լիազորությունների ժամկետը կկազմի հինգ տարի:
Ի սկզբանե ընտրացուցակում ընդգրկվել էր 11 կուսակցություն, սակայն ավելի ուշ «Յաբլոկո» կուսակցությանը դուրս են թողել ընտրապայքարից: Քվեաթերթիկում մնացել են 10 քաղաքական ուժ, այդ թվում՝ «Միասնական Ռուսաստանը», Լիբերալ-դեմոկրատական կուսակցությունը, «Ուղիղ ժողովրդավարություն» կուսակցությունը, Կանաչները, «Արդար Ռուսաստանը», Կոմունիստական կուսացությունը և այլ ուժեր:
Դիտումների քանակ1