ԱՄՆ Պետդեպարտամենտը հաստատել է Ուկրաինային 2.7 միլիարդ դոլարի ռազմական սարքավորումների և ծառայությունների հնարավոր վաճառքը՝ նրա հակաօդային պաշտպանության համակարգերը արդիականացնելու համար։
Այս մասին հայտարարվել է գերատեսչության հայտարարության մեջ։ Այնտեղ նշվում է, որ եթե համաձայնագիրը վերջնականապես կնքվի, Ուկրաինան այն կֆինանսավորի եվրոպացի գործընկերների ներդրումների և ԱՄՆ-ի արտաքին ռազմական ֆինանսավորման (FMF) ծրագրի միջոցով, որը հատկացվել է Ջո Բայդենի նախագահության տարիներին։
Պետդեպարտամենտը պարզաբանել է, որ FMF ծրագիրը տրամադրում է դրամաշնորհային օգնություն, որը թույլ է տալիս երկրներին գնել ԱՄՆ-ում արտադրված զենք և պաշտպանական սարքավորումներ։
«FMF միջոցները կհաշվարկվեն որպես ԱՄՆ ներդրում Ուկրաինայի վերականգնման ներդրումային հիմնադրամում՝ մեկ-մեկ փոխհատուցման հիմունքներով», – նշել է Պետդեպարտամենտը։
Ուկրաինայի վերականգնման ներդրումային հիմնադրամը ստեղծվել է ԱՄՆ-ի և Ուկրաինայի միջև անցյալ տարի ստորագրված հանքային ռեսուրսների համաձայնագրի շրջանակներում։
Պետդեպարտամենտի տվյալներով՝ փաթեթը ներառում է.
- S-300 համարժեք հրթիռներ,
- GAM-67 հրթիռներ, լազերային ուղղորդմամբ, մեծ հեռահարության հակաօդային պաշտպանության հրթիռային համակարգեր,
- արդիականացման հավաքածուներ արձակման սարքերի և շարժական արձակման համակարգերի համար։
- ռադարներ անօդաչու թռչող սարքերի դեմ պայքարի համակարգերի համար։
Պետդեպարտամենտը նշել է, որ հնարավոր համաձայնագիրը դեռևս պահանջում է Կոնգրեսի կողմից վերանայում։