Վարչապետ․ ՀՀ-ն ու ՌԴ-ն շարունակում են երկաթուղու կառավարման հարցի քննարկումները

Հայաստանն ու Ռուսաստանը շարունակում են հայկական երկաթուղու կոնցեսիոն կառավարման հարցի լուծման շուրջ քննարկումները, հայտարարել է Հայաստանի վարչապետ Նիկոլ Փաշինյանը:

«Իրադրության փոփոխություն չի եղել, քննարկումները շարունակվում են, դա շատ նուրբ հարց է: Դա մեր սեփականությունն է, և մենք մեր սեփականությունը տնօրինելու հնարավորություն պետք է ունենանք այնպես, ինչպես ուզում ենք»,- ասել է վարչապետը, հայտնում է Արմենպրեսը:

Նա հավելել է, որ այս հարցի լուծման համար Հայաստանը ժամկետներ չի սահմանում:

«Մենք հանգիստ քննարկում ենք այդ հարցը՝ մյուս հարցերի հետ փոխկապակցվածության մեջ: Մենք աշխատում ենք, որ հնարավորինս արագ, հնարավորինս բարեկամաբար այդ խնդիրը լուծվի»,- նշել է Փաշինյանը:

Անդրադառնալով ռուսական գազի սակագնի հնարավոր վերանայման վերաբերյալ հարցին՝ նա նշել է, որ Հայաստանի և Ռուսաստանի միջև շարունակվել է հարաբերությունների գույքագրման գործընթացը, որի ընթացքում կողմերը դիտարկում են համագործակցության տարբեր ոլորտները։

«Ինչպես Բիշքեկյան բանակցությունների ընթացքում Ռուսաստանի հետ մենք պայմանավորվեցինք՝ շարունակում ենք Հայաստանի Հանրապետություն-Ռուսաստանի Դաշնություն հարաբերությունների գույքագրում իրականացնել՝ տեսնելու, թե դրանք ինչ շերտերից են բաղկացած: Գալիս է երկաթուղու հարցը, բոլորը սկսում են զբաղվել դրանով, հետո գալիս է գազի հարցը. ՀՀ-ՌԴ հարաբերությունները բազմաշերտ են և այդտեղ բազմաթիվ խնդիրներ, հարցեր, հնարավորություններ կան: Գույքագրման այդ պրոցեսը գնում է, և քննարկումները շարունակվում կամ սկսվում են»,- ասել է Փաշինյանը:

Վարչապետը հավելել է, որ գազի ներկրման և այլ հարցերի շուրջ բանակցություններ են վարվում բոլոր հնարավոր երկրների հետ։