Եվրահանձնաժողովի նախագահ Ուրսուլա ֆոն դեր Լայենը Եվրախորհրդարանի պատգամավորների առջև ամենամյա ելույթում հայտարարել է, որ Եվրամիությունը նախատեսում է մինչև 12 մլրդ եվրոյի պետական և մասնավոր ներդրումներ ներգրավել՝ Հարավային Կովկասն ու Կենտրոնական Ասիան եվրոպական շուկային ուղղակիորեն կապող «Միջին միջանցքի» զարգացման համար։
Եվրախորհրդարանում «Եվրամիության վիճակի մասին» ուղերձում ֆոն դեր Լայենն ասել է, որ նոր միջազգային կապակցվածության նախագիծը պետք է դիվերսիֆիկացնի Եվրոպա-Ասիա առևտրային երթուղիները, մինչև 2030 թվականը եռապատկի առևտրային հոսքերը և կրճատի բեռնափոխադրումների տարանցման ժամանակը։
Նախագիծը նախատեսվում է առաջ մղել «Global Gateway» եվրոպական ծրագրի միջոցով։
Թեև Եվրահանձնաժողովի նախագահը Հայաստանի անունը չի նշել, սակայն հուլիսին արածաշրջանային այցի ընթացքում նա Երևանում խոսել էր նոր՝ 200 միլիոն եվրո արժողությամբ «Գլոբալ դարպաս» (Global Gateway) փաթեթի մասին: Ծրագիրը միտված է Հարավային Կովկասում փոխկապակցվածության միջոցով խաղաղության ամրապնդմանը և ունի մինչև 2 միլիարդ եվրոյի պետական ու մասնավոր ներդրումներ ներգրավելու ներուժ։
Այսօրվա ելույթում Եվրոպական հանձնաժողովի նախագահը նաև ընդգծել է, որ ԵՄ-ն ունի առևտրային համաձայնագրեր ավելի քան 80 երկրի հետ և ցանկանում է նոր գործընկերություններ կառուցել՝ «տոկունության և ժողովրդավարությունների գլոբալ կոալիցիաներ» ձևավորելու նպատակով։
Ռուսաստանը ելույթի առանցքային թեմաներից է եղել։ Ֆոն դեր Լայենը կրկին հայտարարել է, որ ԵՄ-ն շարունակելու է աջակցել Կիևին՝ հատկապես ձմեռային շրջանի հումանիտար, էներգետիկ և հակաօդային պաշտպանության կարիքների հարցում։
Եվրահանձնաժողովի նախագահը նշել է, որ Եվրոպան արդեն էապես փոխել է իր էներգետիկ քաղաքականությունը Ռուսաստանի՝ գազի մատակարարումները սահմանափակելուց հետո։ Նրա խոսքով՝ ԵՄ-ն դիվերսիֆիկացրել է մատակարարումներն ու ավելի շատ ներդրել վերականգնվող և միջուկային էներգետիկայում, սակայն ներմուծվող հանածո վառելիքից ընդհանուր կախվածությունը շարունակում է մեծ տնտեսական գին ունենալ։ Նա հայտարարել է, որ հակամարտության սկզբից ի վեր ներմուծվող հանածո վառելիքը Եվրոպայի համար հավելյալ 90 մլրդ եվրո է արժեցել։
Ֆոն դեր Լայենը նաև պնդել է, որ Եվրոպան բախվում է Ռուսաստանի հետ կապվող հիբրիդային սպառնալիքների՝ կիբերհարձակումների, դիվերսիաների, հրկիզումների, անօդաչու թռչող սարքերի ներխուժումների և ապատեղեկատվության։
Կարինե Ասատրյան
Բրյուսել