Հայաստանի պետական սիմֆոնիկ նվագախումբը մեկնարկում է 21-րդ համերգաշրջանը. սեպտեմբերի 9-ին՝ ժամը 19:30-ին, «Արամ Խաչատրյան» համերգասրահում տեղի կունենա բացման համերգը: Այս մասին տեղեկացնում է Կրթության, գիտության, մշակույթի և սպորտի նախարարությունը։
Այս առիթով տեղի է ունեցել մամուլիս ասուլիս, որի բանախոսներն էին ՀՀ կրթության, գիտության, մշակույթի և սպորտի նախարարի տեղակալ Տիգրան Վիրաբյանը և Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը:
Բանախոսներն անդրադարձել են նոր համերգաշրջանին, առաջիկա ծրագրերին հրավիրվող մենակատարներին և դիրիժորներին, ԿԳՄՍ նախարարության հետ համագործակցությանը, նոր նախաձեռնություններին, ինչպես նաև ամփոփել են հոբելյանական 20-րդ համերգաշրջանը:
Սիմֆոնիկը՝ ժամանակակից նվագախմբի մոդել
ԿԳՄՍ նախարարի տեղակալ Տիգրան Վիրաբյանը Սիմֆոնիկ նվագախմբի 20-րդ համերգաշրջանի արդյունքները համարել է հաջողված՝ ընդգծելով, որ գլխավոր միջոցառումը պատմական էր Հայաստանի Հանրապետության մշակութային կյանքում. «Հայաստանի պետական սիմֆոնիկ նվագախումբը խիզախեց և այն անցկացրեց Մարզահամերգային համալիրի սպորտային դահլիճում: Լեցուն դահլիճն ապացուցեց, որ Հայաստանում հազարավոր մարդիկ դասական երաժշտության սիրահար են, և դասական երաժշտությունը միշտ սպասված է»:
Նա նաև ընդգծել է՝ «Սիմֆոնիկ»-ը ժամանակակից նվագախմբի իսկական մոդել է, որն առանձնանում է պրոֆեսիոնալիզմով և ժանրային խիստ առանձնահատկություններով, ինչը շքեղություն է մշակութային կյանքի համար:
Տիգրան Վիրաբյանը կարևորել է կրթական բաղադրիչը՝ սովորողների և դասական երաժշտության շփումը, ինչպես նաև այս ժանրը դպրոցահասակների համար ընկալելի և սիրելի դարձնելը:
Նրա խոսքով՝ որպես պետական քաղաքականություն՝ առանցքային է մշակութային կյանքի ակտիվացումը մարզերում․ այդ նպատակին ուղղված մեծ նախագիծ է պատրաստվել Անկախության 35-ամյակի շրջանակում։ Հայաստանի պետական սիմֆոնիկ նվագախումբը սեպտեմբերի 18-ին Վանաձորի Հայքի հրապարակում հանդես կգա «Սիմֆոնիկ ռոք» և «Սիմֆոնիկ ֆոլկ» ծրագրերով, իսկ սեպտեմբերի 21-ին կմասնակցի Հանրապետության հրապարակի տոնական ամփոփիչ համերգին։
Ամփոփելով խոսքը՝ ԿԳՄՍ նախարարի տեղակալը հաջողություն է մաղթել նվագախմբին՝ կարևորելով վերջինիս դերը հայ երաժշտարվեստի տարածման և հանրահռչակման գործում:
21-րդ համերգաշրջան․ հրավիրված են դասական աստղեր
Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի խոսքով՝ 21-րդ համերգաշրջանը նշանավորվելու է միջազգային հայտնի երաժիշտների մասնակցությամբ: Մեկնարկի համերգին ելույթով հանդես կգա հայտնի դաշնակահար Բեհզոդ Աբդուրաիմովը:
Նա ներկայացրել է համերգաշրջանի գլխավոր դերակատարներին՝ հրավիրված արտիստներին ու դիրիժորներին, որոնց թվում են ջութակահար Նոա Բենդիքսը, դաշնակահար Բրյուս Լյուն, թավջութակահար Գայ Ջոնսոնը, դաշնակահար Ալիս Սառա Օտտը, ալտահար Դեյվիդ Աարոն Քարփենթերը և այլք:
«Նման դասական աստղերի հրավիրելով՝ ամրապնդում ենք Հայաստանի դիրքը մշակութային քարտեզում, ինչը մեր մեծագույն ձեռքբերումն է»,- ասել է Սմբատյանը՝ ընդգծելով, որ նվագախումբն ունի մեծ լսարան ոչ միայն Հայաստանում, այլև Հայաստանի սահմաններից դուրս:
Այս համատեքստում նա հավելել է՝ կա հստակ առաքելություն և ռազմավարություն դրսում ներկայացնել մեր մեծանուն կոմպոզիտորների ժառանգությունը և ժամանակակից կոմպոզիտորներին: Ըստ Սմբատյանի՝ 21-րդ համերգաշրջանի կարևոր իրադարձություններից է սիմֆոնիկ և օպերային երաժշտության ոլորտում մեծ ճանաչում ունեցող դիրիժոր Իոն Մարինի համերգը Հայաստանում, որը կկայանա սեպտեմբերի 30-ին: Սմբատյանի գնահատմամբ՝ միջազգային հայտնի դեմքերի ներկայությունն ամրապնդում է նվագախմբի կեցվածքը միջազգային հարթակներում: