Մոսկվան կոչ է անում Ճապոնիայի իշխանություններին վերադառնալ խաղաղասիրական դիրքորոշման և վերահաստատում է, որ Ռուսաստանի ինքնիշխանությունը Կուրիլյան կղզիների նկատմամբ անվիճելի է։
Այս մասին հայտարարել է Ռուսաստանի Դաշնության արտաքին գործերի նախարարության խոսնակ Մարիա Զախարովան Արևելյան տնտեսական ֆորումի շրջանակներում կայացած ճեպազրույցի ժամանակ։
«Այսօր պաշտոնական Տոկիոն համառորեն հրաժարվում է լիովին ճանաչել Երկրորդ համաշխարհային պատերազմի արդյունքները, ներառյալ դրա պատճառների, հանգամանքների և արդյունքների գլոբալ գնահատականները։
Ճապոնիայի ներկայիս կառավարության վերառազմականացման քաղաքականությունը, ինչպես նաև ասիական ագրեսիայի հանցագործությունները սպիտակեցնելու և Ռուսաստանի նկատմամբ անհեթեթ, անօրինական տարածքային պահանջներ ներկայացնելու փորձերը, աճող մտահոգություն են առաջացնում Ճապոնիայի հարևանների և Ասիա-խաղաղօվկիանոսյան տարածաշրջանի պետությունների մեծ մասի շրջանում։ Հետևաբար, մենք կրկին կոչ ենք անում ճապոնական իշխանություններին վերադառնալ իրենց սեփական Սահմանադրությամբ ամրագրված պացիֆիզմի սկզբունքներին։
Կարևոր է նաև ընդգծել, որ Կուրիլյան կղզիները Ռուսաստանին են փոխանցվել լիովին օրինական հիմքերով Երկրորդ համաշխարհային պատերազմից հետո, ինչպես ամրագրված է Դաշնակից տերությունների համաձայնագրերում և ՄԱԿ-ի կանոնադրությունում։ Ռուսաստանի ինքնիշխանությունը և իրավասությունն այս տարածքների նկատմամբ կասկածի տակ չեն», – ասել է դիվանագետը։