ԱԹՍ-ները Ռոստովի մարզում հարվածել են OZON-ի և DNS-ի պահեստներին
Ռոստովի մարզում ուկրաինական անօդաչու թռչող սարքերի հարվածների հետևանքով, ըստ իշխանությունների, վիրավորվել է յոթ մարդ։ Հարվածել են OZON-ին և DNS առցանց խանութին պատկանող պահեստներին, վնասվել են նաև բնակելի շենքեր։
OZON-ի մամուլի ծառայությունը հաստատել է, որ ԱԹՍ-ն հարվածել է Աքսայի իրենց պահեստին։ Ընկերությունը պնդում է, որ աշխատողները նախապես տարհանվել են, վիրավորներ չկան, և «փոքր հրդեհը» անմիջապես մարվել է։ Սակայն պահեստը «ժամանակավորապես դադարեցրել է գործունեությունը» և դեռևս չի ընդունում առաքումներ:
Նահանգապետ Սլյուսարի խոսքով՝ Դոնի Ռոստովում անօդաչու թռչող սարքի հարձակումից հետո հոսպիտալացվել է չորս մարդ, այդ թվում՝ երկու երեխա, որոնցից մեկը ծանր վիճակում է: Քաղաքի Պրոլետարսկի շրջանում իշխանությունները հայտնել են, որ վնասվել է երկու բնակելի շենք: Բնակիչները տարհանվում են, և ստեղծվել է ժամանակավոր կացարան, գրում է «Ազատությունը»։
Անօդաչու թռչող սարքերը հարձակվել են նաև Բելգորոդի մարզի վրա օգոստոսի 28-ի երեկոյան: Ըստ «Պեպել» լրատվամիջոցի՝ ԱԹՍ-ն հարվածել է Բորիսովսկի շրջանի Գրուզսկոյե գյուղում գտնվող թռչնաբուծական ֆերմայի աշխատողներին տեղափոխող միկրոավտոբուսին: Երկու մարդ զոհվել է, իսկ միկրոավտոբուսում գտնվող ևս վեցը վիրավորվել են:
Ռուսաստանի քննչական կոմիտեն հաստատել է Բելգորոդի և Ռոստովի մարզերում ուկրաինական անօդաչու թռչող սարքերի հարվածները՝ դրանք անվանելով «ահաբեկչական գործողություններ»։
Ռուսաստանի պաշտպանության նախարարությունը հայտարարել է, որ անցած գիշեր Բելգորոդի, Բրյանսկի, Վորոնեժի, Կալուգայի, Կուրսկի, Լիպեցկի, Ռոստովի և Տուլայի մարզերում, ինչպես նաև Մոսկվայի մարզում, Կրասնոդարում, Թաթարստանում, Ղրիմում, Ազովի և Սև ծովերի հատվածում խոցել են ընդհանուր առմամբ 313 ուկրաինական անօդաչու թռչող սարք։ Նախարարությունը չի բացահայտել յուրաքանչյուր շրջանում խոցված անօդաչու թռչող սարքերի կոնկրետ թիվը։