Քաղաքականություն
27.08.2026 | 17:46
Վճռականորեն դատապարտում ենք օգոստոսի 27-ին ՌԴ-ում Ադրբեջանի դեսպանատան հյուրատան դիմաց անհայտ անձանց կողմից մեր երկրի դեմ ուղղված սադրիչ բնույթի պատկերների տեղադրումը, հայտարարել է Ադրբեջանի ԱԳՆ-ն։
«Չի բացառվում, այս անընդունելի սադրանքը, բացի ադրբեջանա-ռուսական հարաբերություններն արհեստականորեն սրելու փորձից, Ադրբեջանի դեմ վերջերս մի շարք ռուսական լրատվամիջոցների կողմից իրականացվող կեղտոտ և կողմնակալ արշավի մաս է կազմում»,- ասվում է հայտարարության մեջ։
Ադրբեջանական կողմը կոչ է անում Ռուսաստանի Դաշնության համապատասխան մարմիններին՝ նման սադրիչ գործողություններին պատշաճ իրավական գնահատական տալ, ապահովել միջադեպի համապարփակ հետաքննությունը և ձեռնարկել անհրաժեշտ միջոցներ՝ նման դեպքերի կրկնությունը կանխելու համար։
«Մենք ակնկալում ենք, որ ռուսական կողմը լիովին կկատարի իր պարտավորությունները՝ համաձայն 1961 թվականի Վիեննայի դիվանագիտական հարաբերությունների մասին կոնվենցիայի՝ Ադրբեջանի դեսպանատան և նրա աշխատակիցների համար անվտանգության բավարար մակարդակ ապահովելու, ինչպես նաև դիվանագիտական առաքելության բնականոն գործունեությանը խոչընդոտող ցանկացած սադրիչ գործողություն կանխելու համար»,- նշել է Ադրբեջանի ԱԳՆ-ն։
Հավելենք, որ Ազգային-բոլշևիկյան կուսակցության ներկայացուցիչներն ակցիա էին անցկացրել դեսպանատան հյուրատան մոտ ու փակցրել «Ռուսական արյունը ձեր ձեռքերի վրա է», «Ձեռքերը հեռու ռուս քաղաքացիներից» և «Պետական անվտանգության ծառայությունը խոշտանգում է, Ալիևը թաքցնում է» գրառմամբ երեք պաստառ։
Թարգմանությունը՝ Էմմա Չոբանյանի