Վարչապետի աշխատակազմի ղեկավար Լիլիթ Մակունցը հանդիպում է ունեցել Հայաստանում Եվրոպական միության գործընկերության առաքելության ղեկավար Կոսմին Դինեսկուի հետ
ԵՐԵՎԱՆ, 17 օգոստոսի․/ԱՌԿԱ/․ Վարչապետի աշխատակազմի ղեկավար Լիլիթ Մակունցը հանդիպում է ունեցել Հայաստանում Եվրոպական միության գործընկերության առաքելության ղեկավար Կոսմին Դինեսկուի հետ։
Լիլիթ Մակունցը ողջունել է Առաքելության գործունեության մեկնարկը և կարևորել ԵՄ աջակցությունը Հայաստանի պետական ինստիտուտների դիմակայունության ամրապնդման գործում։
Հանդիպմանը քննարկվել են Առաքելության մանդատի շրջանակում համագործակցության առաջնահերթությունները։ Վարչապետի աշխատակազմի ղեկավարն ընդգծել է համապատասխան պետական մարմինների համակարգված ներգրավվածության և Առաքելության մանդատով նախատեսված ուղղություններով կարողությունների զարգացման կարևորությունը։
Կողմերը մտքեր են փոխանակել համագործակցության հետագա կազմակերպման և արդյունավետ համակարգման շուրջ։
ԵՄ Գործընկերության առաքելությունը Հայաստանում հիմնադրվել է 2026 թվականի ապրիլի 21-ին՝ հայկական իշխանությունների խնդրանքով, և աշխատանքն սկսել է հուլիսի 13-ին։ Դրա երկամյա մանդատը նախատեսում է խորհրդատվական և փորձագիտական աջակցության տրամադրում Հայաստանի պետական կառույցներին՝ կիբեռսպառնալիքների, օտարերկրյա տեղեկատվական միջամտության և ապօրինի ֆինանսական հոսքերի հակազդման գործում։