Քաղաքականություն
17.08.2026 | 11:40
Օգոստոսի լույս 17-ի գիշերը ռուսական բանակն Ուկրաինայի վրա արձակել է 128 անօդաչու թռչող սարք, որոնցից ուկրաինական ուժերը խոցել են 106-ը։ Ուկրաինայի ռազմաօդային ուժերի հրամանատարության տվյալներով՝ անօդաչու թռչող սարքերի հարվածներ են գրանցվել 14 վայրերում, գրում է Current time-ը։
Դնեպրոպետրովսկի մարզային ռազմական վարչակազմի ղեկավար Ալեքսանդր Գանժայի տեղեկացմամբ՝ մարզում ռուսական հարձակումների հետևանքով վիրավորվել է 5 մարդ։ Այնտեղ այրվել են մասնավոր տուն, օժանդակ շինություն և մեքենա։
Խերսոնի մարզում 54-ամյա տղամարդ է վիրավորվել Դնեպրի շրջանում մասնավոր տան վրա անօդաչու թռչող սարքի հարվածից։ Նրա մոտ ախտորոշվել է պայթյունի վնասվածք, ուղեղի ցնցում և գլխի վնասվածք։
Պոլտավայի մարզի Կրեմենչուկի շրջանում հրդեհվել են երկու արդյունաբերական օբյեկտներ: Ուկրաինայի արտակարգ իրավիճակների պետական ծառայությունը նշել է, որ մեկ օբյեկտում հրդեհն արագորեն մարվել է, իսկ մյուսում, հետագա հարվածների սպառնալիքի պատճառով, հրդեհաշիջման աշխատանքները հետաձգվել են։ Հրդեհը, ի վերջո, մարվել է:
Օդեսայի մարզում, ռազմական վարչակազմի ղեկավար Օլեգ Կիպերի տեղեկացմամբ, ռուսական բանակը կրկին հարձակվել է նավահանգստային ենթակառուցվածքների վրա՝ վնասելով Տոգոյի դրոշի ներքո նավարկող քաղաքացիական նավ: 4 մարդ վիրավորվել է: Տուժածներից մեկը ծանր վիճակում է: