Բաժանորդագրվել
Տեղական իշխանությունների տվյալներով՝ գիշերվա ընթացքում հրդեհի մակերեսը չի ավելացել։
ԵՐԵՎԱՆ, 15 օգոստոսի – Sputnik. Գերմանիայի արևմուտքում գտնվող Հյուրթգենվալդ բնակավայրի շրջանում բռնկված խոշոր անտառային հրդեհի մարման աշխատանքներում 1400 մարդ է ներգրավվել, այդ թվում՝ ոստիկաններ և զինվորականներ։ Այս մասին հայտնում է ՌԻԱ Նովոստին՝ հղում անելով Հյուսիսային Հռենոս-Վեստֆալիա դաշնային երկրամասի Դյուրեն շրջանի վարչակազմին։
«Bild»–ը երեկ հայտնել էր, որ 25 հեկտար տարածք ընդգրկած անտառային հրդեհի պատճառով Հյուրթգենվալդի շրջանում մի ամբողջ գյուղի բնակչություն է տարհանվել։
«Հրդեհի մարման աշխատանքներում այս պահին 1400 մարդ է ներգրավված։ Նրանց թվում են հրշեջները, ոստիկանությունը, բունդեսվերը, ինչպես նաև մարդասիրական կազմակերպություններ… և Գերմանական Կարմիր Խաչը։ Բացի այդ, շարունակում են մասնակցել բազմաթիվ կամավորներ, մասնավորապես՝ ֆերմերներ»,- ասված է շրջանային վարչակազմի կայքում հրապարակված հաղորդագրության մեջ:
Տեղական իշխանությունների տվյալներով՝ անցած գիշերվա ընթացքում հրդեհի մակերեսը չի ավելացել։ Սակայն մասնագետները եղանակային պայմանների վատթարացում են սպասում՝ մոտեցող հյուսիսային քամու պատճառով։
Շարունակվող գործողության հետ կապված՝ մոտակա հինգ բնակավայրերի բնակիչներին կոչ են արել խնայողաբար օգտագործել ջուրը։