Ազգային ժողովի արտաքին հարաբերությունների մշտական հանձնաժողովի նախագահի թեկնածու Սարգիս Խանդանյանը հայտնել է, որ Հայաստանի իշխանություններն այլևս առաջնային չեն համարում Հայոց ցեղասպանության միջազգային ճանաչման հարցը։
Նա հերքել է տեղեկությունները, թե Թուրքիան պահանջներ է ներկայացրել Ցեղասպանության ճանաչումից հրաժարվելու կամ Արարատ լեռը պետական խորհրդանիշներից հեռացնելու վերաբերյալ։ Խանդանյանը պարզաբանել է, որ գործընթացն իրականացվել է առանց նախապայմանների, հայտնում է Factor.am-ը:
«Բանակցությունների որևէ փուլում նման պահանջ, նման նույնիսկ ակնարկ Թուրքիայի ներկայացուցիչների կողմից երբևէ չի եղել»,- շեշտել է նա:
Խանդանյանի գնահատմամբ՝ Ցեղասպանության հարցն արտաքին քաղաքական օրակարգ ներառելը նախկին իշխանությունների սխալ քայլն է եղել։ Նրա խոսքով՝ այդ հարցն ապագայում ևս չպետք է առաջնահերթություն դառնա։
«Հայաստանի կառավարությունը, մասնավորապես Ռոբերտ Քոչարյանի տարիներին, երբ որ այդ հարցը բերել է և դարձրել ազգային արտաքին քաղաքական առաջնահերթություն, մեծագույն սխալ է գործել»,- հայտարարել է պատգամավորը:
Իր դիրքորոշումը հիմնավորելիս Խանդանյանը նշել է, որ տարբեր երկրներ Ցեղասպանության ճանաչման հարցն օգտագործել են որպես քաղաքական գործիք։ Նա օրինակ է բերել այն պետություններին, որոնք Ցեղասպանությունը ճանաչող բանաձևեր ընդունելու հետ մեկտեղ Ադրբեջանի հետ ռազմական խոշոր պայմանագրեր են կնքել։
«Հայոց ցեղասպանությունը չպետք է դարձնել որևէ տեսակի բանակցության առարկա»,- եզրափակել է նա:
Հայոց ցեղասպանության ճանաչման գործընթացը սկսվել է 1915 թվականի մայիսի 24-ի ֆրանս-բրիտանա-ռուսական համատեղ Հռչակագրի հրապարակմամբ և մինչ օրս չի ավարտվել, և վերսկսվել 1965 թվականից, երբ Ուրուգվայը պետականորեն առաջինը պաշտոնապես ճանաչեց Հայոց ցեղասպանությունը։