ԱՄՆ նախագահ Դոնալդ Թրամփը վերահաստատել է իր պնդումը, որ չի պարտվել 2020 թվականի ընտրություններում Ջո Բայդենին և կատակով հայտարարել է, որ պլանավորում է կրկին առաջադրվել 2028 թվականին։
«Ես պլանավորում եմ չորրորդ ժամկետով առաջադրվել որպես Միացյալ Նահանգների նախագահ», – ասել է Թրամփը Սպիտակ տան լրագրողների հետ ընթրիքի ժամանակ։ Այս ելույթն ասելիս նա հագել է բեյսբոլի գլխարկ՝ «Թրամփ 2028» գրությամբ։
ԱՄՆ Սահմանադրությունն արգելում է նույն անձին 2-ից ավելի ժամկետով նախագահ լինել։ Չորրորդ ժամկետի մասին խոսելով՝ Թրամփը ակնարկել է, որ կարծում է, թե ինքն է հաղթել 2020 թվականին և, հետևաբար, այդ ժամանակ պետք է լիներ նախագահ, այլ ոչ թե Բայդենը։
Թրամփը նաև կատակել է իր հիմնական քաղաքական հակառակորդներից մեկի՝ դեմոկրատ կոնգրեսական Ադամ Շիֆի մասին։ Նա նշել է, որ Սպիտակ տան մամուլի ասոցիացիան պլանավորել էր ծաղրածուի հրավիրել գալա ընթրիքին, «բայց Ադամ Շիֆը այդ երեկոյան հասանելի չէր»։ ԱՄՆ նախագահը հավելել է, որ Շիֆն ունեցել է «ամենամեծ գլխի, որ ես երբևէ տեսել եմ, և ամենանուրբ, մատիտի պես բարակ պարանոցի համադրությունը»։
Իր ելույթի ընթացքում Թրամփը նաև քննադատել է լրագրողներին իր նախագահական ժամկետի ընթացքում «կողմնակալ լուսաբանման համար»։ Նա կատակել է, որ իր նախագահական ժամկետի ավարտից հետո լրագրողները կսնանկանան, «քանի որ այլևս ոչ ոք չի լինի, որի մասին գրեն»։
Նախագահը նաև կատակել է իր առողջապահության նախարար Ռոբերտ Քենեդի Կրտսերի մասին. «Հուսով եմ՝ դուք վայելեցիք այսօր ձեզ մատուցված հիանալի տավարի ֆիլեն։ Այն շատ յուրահատուկ է։ Ես ուզում էի ձեզ տեղեկացնել, որ Բոբի Քենեդին, ով այսօր այստեղ է, անձամբ իր մեքենայով հարվածել է այս կովին։ Նա ինքը կտրատել է կովը և բերել այստեղ։ Այնպես որ, միսը բացարձակապես թարմ է»։
Թրամփի ընթրիքը լրագրողների հետ նախատեսված էր տեղի ունենալ այս տարվա սկզբին Վաշինգտոնի հյուրանոցներից մեկում։ Սակայն միջոցառումը ընդհատվել էր և վերանշանակվել զինված տղամարդու պատճառով, ով փորձել էր ներխուժել սենյակ, որտեղ նստած էին հյուրերը։