Մարտին սպանություն կատարած եղբայրները հայտնաբերվել, ձերբակալվել են. նրանցից մեկը տվել է խոստովանական ցուցմունք
ԵՐԵՎԱՆ, 23 հուլիսի․/Նովոստի-Արմենիա/․ Արագածոտնի մարզի քրեական ոստիկանների իրականացրած օպերատիվ-հետախուզական աշխատանքների արդյունքում բացահայտվել է ամիսներ առաջ տեղի ունեցած դաժան սպանություն:
Ինչպես հայտնում է Ոստիկանությունը, հուլիսի 22-ին Արագածոտնի մարզային վարչություն հաղորդում էր ստացվել 1970 թվականին ծնված Ռ․ Մ․-ի անհետ կորելու մասին։
Օպերատիվ տեղեկությունների իրացման արդյունքում փաստական տվյալներ են ձեռք բերվել, որ սույն թվականի մարտ ամսին Մելիքգյուղ գյուղի իրենց բնակարանում կենցաղային հարցերի շուրջ ծագած վիճաբանության ժամանակ 25-ամյա և 20-ամյա եղբայրները գրտնակի հարվածով սպանել են իրենց մորը։
Հանցագործության հետքերը վերացնելու և քողարկելու նպատակով որդիները դիակը տեղափոխել են տան հարևանությամբ գտնվող կիսակառույց շինություն և թաքցրել հողաշերտի տակ։
Հուլիսի 22-ին եղբայրները հայտնաբերվել, ձերբակալվել և տեղափոխվել են Քրեական ոստիկանության Արագածոտնի մարզային վարչություն, որտեղ նրանցից մեկը տվել է խոստովանական ցուցմունք:
Նախաձեռնված քրվարույթի շրջանակում մատնանշված վայրում՝ հողաշերտի տակից, հայտնաբերվել է 56-ամյա կնոջ դին։
Երիտասարդներն ու կազմված փաստաթղթերն ուղարկվել են նախաքննական մարմին: Եղբայրները ձերբակալվել և տեղափոխվել են ձերբակալվածների պահման վայր։ Նախաքննությունը շարունակվում է: