Ռուսաստանը պատրաստ է նպաստել Բաքվի և Երևանի միջև տրանսպորտային և տնտեսական կապերի հաստատմանը և մարդասիրական հարցերի լուծմանը, հայտարարել է Ռուսաստանի արտաքին գործերի նախարար Սերգեյ Լավրովը Ադրբեջանի արտաքին գործերի նախարար Ջեյհուն Բայրամովի հետ բանակցություններից հետո տեղի ունեցած մամուլի ասուլիսում։
«Ռուսաստանը մշտապես աջակցում է Ադրբեջանի և Հայաստանի՝ հարաբերությունների լիարժեք և համապարփակ կարգավորմանն ուղղված ջանքերին՝ հիմնվելով 2020 և 2022 թվականներին ձեռք բերված եռակողմ բարձր մակարդակի համաձայնագրերի վրա։ Ինչպես նախկինում, մենք պատրաստ ենք օգնել և՛ Բաքվին, և՛ Երևանին տրանսպորտային և տնտեսական կապերի ապաշրջափակման և մարդասիրական հարցերի լուծման գործում», – ասել է նախարարը։
Լավրովի խոսքով՝ Բայրամովի հետ բանակցությունների ընթացքում նշվել են Ադրբեջանի նախագահ Իլհամ Ալիևի հայտարարությունները, որ «ռուս-ադրբեջանական հարաբերությունները լիովին կարգավորվել են, և նախկին դժվարությունները մնացել են անցյալում»։ «Մենք ընդունել ենք այս իրականության ըմբռնումը երկու կողմերի մոտ և համաձայնել ենք աշխատել՝ լրացնելու այն բացը, որը առաջացել է մեր հարաբերություններում վերջին մի քանի ամիսների ընթացքում», – ընդգծել է նախարարը։
Ռուսաստանի արտաքին գործերի նախարարը նշել է, որ հանդիպման ժամանակ նախարարները ողջունել են միջկառավարական կապերի դինամիկ զարգացումը, մասնավորապես՝ վարչապետների մակարդակով, և ակտիվ միջխորհրդարանական երկխոսությունը։ Նա նշեց, որ երկու երկրների միջև բոլոր մակարդակներում ընթանում է նաև արտաքին քաղաքականության վերաբերյալ ակտիվ երկխոսություն։
ԱԳ նախարարները քննարկել են նաև առևտրատնտեսական համագործակցությունը։ «Մենք նշել ենք, որ կա փոխադարձ հետաքրքրություն առևտրաշրջանառության հետագա աճի հարցում։ Անցյալ տարի երկկողմ առևտուրը հասել է գրեթե 5 միլիարդ դոլարի։ Ռուսաստանը մնում է Ադրբեջանի առաջատար տնտեսական գործընկերներից մեկը, և կա զգալի ներուժ մեր առևտրաշրջանառության և ուղղակի ներդրումների ավելացման համար», – ընդգծել է Լավրովը՝ հավելելով, որ Ռուսաստանի ներդրումները Ադրբեջանում կազմում են գրեթե 11 միլիարդ դոլար։
Նրա խոսքով՝ հանդիպման ընթացքում քննարկվել է մշակութային, հումանիտար և կրթական ոլորտներում լիարժեք համագործակցության վերսկսումը։ «Մենք մանրամասն քննարկել ենք տարածաշրջանային և միջազգային օրակարգերի արդիական հարցերը։ Մենք ընդգծել ենք մեր համագործակցության կարևորությունը՝ որպես Հարավային Կովկասում և Կասպյան տարածաշրջանում կայունության ապահովման գործոն», – ասել է նախարարը։