Մեծ Բրիտանիայի հեռացող վարչապետ Քիր Սթարմերի հետ համատեղ ճեպազրույցի ժամանակ Ուկրաինայի նախագահ Վլադիմիր Զելենսկին առաջին անգամ հրապարակավ մեկնաբանել է երկրի ՊՆ ղեկավարին փոխարինելու իր որոշումը, գրում է BBC-ի ռուսական ծառայությունը։
Ուկրաինական լրատվամիջոցների տվյալներով՝ Ուկրաինայի նախագահն այս որոշումը կապել է Ֆեդորովի և Ուկրաինայի զինված ուժերի գերագույն հրամանատար Ալեքսանդր Սիրսկիի միջև կոնֆլիկտի հետ։ Նա ասել է, որ Գլխավոր շտաբի և Պաշտպանության նախարարության միջև հակամարտությունը համակարգային բնույթի է և տեղի է ունեցել «տարբեր մակարդակներում», ուստի դա միայն անձնական հարց չէ։
Պետության ղեկավարը նաև արձագանքել է Ֆեդորովի հրաժարականի դեմ այսօր առավոտից անցկացվող բողոքի ցույցերին։
«Մարդիկ ուզում էին դուրս գալ, և ճիշտ է։ Ես հասկանում եմ, լսում եմ և նույնիսկ արձագանքում եմ հասարակության ասածներին»,- ասել է Զելենսկին։
Նա հավելել է, որ Ֆեդորովի հավանական փոխարինողը՝ ՆԳ նախարար Իգոր Կլիմենկոն, որի մասին երեկ հայտարարվել է, քննարկվող թեկնածուներից մեկն է միայն, սակայն որոշում դեռևս չի կայացվել, և պաշտպանության նախարարի թեկնածուն դեռևս չի ներկայացվել Գերագույն ռադային։
Ուկրաինայի զինված ուժերի գլխավոր հրամանատար Ալեքսանդր Սիրսկին իր տելեգրամ ալիքում գրառում է հրապարակել՝ հայտարարելով իր հպարտության մասին «2022 թվականին Կիևի պաշտպանական գործողության հետ կապված», որը «հնարավոր դարձրեց պաշտպանել Ուկրաինայի մայրաքաղաքը»։ Սիրսկին գլխավորել է Կիևի պաշտպանությունը Ռուսաստանի կողմից Ուկրաինա լայնածավալ ներխուժման սկզբում։
«Այժմ այս քաղաքում կարելի է ճեպազրույցներ անցկացնել, կարելի է ձևակերպել հայեցակարգեր և որոշումներ կայացնել»,- գրել է Սիրսկին՝ ակնհայտորեն ակնարկելով պաշտպանության նախարարի պաշտոնակատար Միխայիլ Ֆեդորովի այսօրվա մամուլի ասուլիսը, որի ընթացքում վերջինն առաջին անգամ հրապարակավ խոստովանել է Սիրսկիի հետ իր կոնֆլիկտը՝ նրան մեղադրելով ՊՆ-ի նախաձեռնություններին խոչընդոտելու մեջ։
Իր գրառման մեջ Սիրսկին կոչ է արել «կենտրոնանալ պատերազմի և արդյունավետ ռազմավարության վրա, որն այժմ ցույց է տալիս կոնկրետ արդյունքներ»։ Սիրսկին նաև շնորհակալություն է հայտնել Ֆեդորովին նախարարի պաշտոնում կատարած աշխատանքի և «Ուկրաինայի թիմում հետագայում մնալու» համար։
Թարգմանությունը՝ Էմմա Չոբանյանի