Անձնական մեքենայով տեղաշարժը Երևանում կարող է սահմանափակվել։ Գործակարգավարական հերթական խորհրդակցությանը քաղաքապետ Տիգրան Ավինյանը մայրաքաղաքի ծանրաբեռնված երթևեկության խնդիրը լուծելու առաջարկ է ներկայացրել։
«Քաղաքի մուտքերի մոտ և տարբեր հատվածներում առանձնացնել այն կետերը, որտեղ ունենaլու ենք մեծ ավտոկայանատեղիներ, որտեղ մարդիկ թողնելու են իրենց անձնական ավտոմեքենան և շարունակելու են տեղաշարժվել հանրային տրանսպորտով»,- ասել է Ավինյան։
Քաղաքապետի խոսքով՝ Երևանի, հատկապես փոքր կենտրոնի փողոցներն ավելի լայնանալու տեղ չունեն, իսկ մեքենաների քանակը տարեցտարի ավելանում է։
«Առաջին բանը, որ մենք պետք է անենք, հանրային տրանսպորտի համար բոլոր հնարավոր տեղերում տալ առանձնացված գծեր, որ հանրային տրանսպորտով ուղևորությունները դառնան է՛լ ավելի ազատ ու հարմար»,- նշեց նա։
Ավինյանի խոսքով՝ հաջորդ քայլը քաղաքի տարբեր հատվածներում ու մետրոյի կայարանների հարևանությամբ մեծ ավտոկայանատեղիների ստեղծումն է։ Քաղաքապետարանն այս գաղափարին է հանգել 2025 թվականի ընթացքում Երևանի երթևեկության կառավարման կենտրոնի կողմից շուրջ 75 մլն ուղևորություն վերլուծելու արդյունքում։ Մեքենաների տեղաշարժի միջին արագությունը քաղաքում նվազել է 25 կմ/ժ-ից մինչև 23,5 կմ/ժ, իսկ ծանրաբեռնված ժամերին՝ ընդամենը 10 կմ/ժ։
Քաղաքացիական ակտիվիստ Արտակ Գաբոյանը համաձայն է՝ քաղաք մտնող մեքենաների մուտքը պետք է սահմանափակել, սակայն կարծում է, որ ավտոկայանատեղիներ պետք է կառուցվեն մասնավորի, այլ ոչ քաղաքապետարանի կողմից։ Ըստ Գաբոյանի՝ եթե ուզում ենք խցանումները թեթևանան, կայանատեղիները պետք է թանկ լինեն։
Factor TV-ն նաև հարցում է արել վարորդների ու հետիոտնի շրջանում՝ պարզելու, թե ինչպես են վերաբերում նման նախաձեռնությանը։
Տիգրան Ավինյանը քաղաքապետարանի տրանսպորտի վարչության պետին հանձնարարել է կառավարման կենտրոնի վերլուծությունները վերջնականացնելուց հետո Ներքին գործերի նախարարության հետ համատեղ երթևեկության կազմակերպման լուծումներ ներկայացնել։
Մանրամասները՝ տեսանյութում։
Անի Թամրազյան