Ռուսաստանի ևս երեք՝ Բրյանսկի, Կուրգանի և Կուրսկի շրջանների իշխանությունները վառելիքի վաճառքի սահմանափակումներ են մտցրել, իսկ Մոսկվայի իշխանությունները թույլատրել են վառելիք տեղափոխող բեռնատարներին մուտք գործել քաղաք 24/7 ռեժիմով և տեղաշարժվել առանց բեռնափոխադրման թույլտվության, գրում է Current time-ը։
Բրյանսկի մարզում բենզալցակայաններում արգելվել է տարաներում բենզին լցնելը: Բրյանսկի մարզի նահանգապետի պաշտոնակատար Եգոր Կովալչուկը հայտարարել է, որ դա արվում է վառելիքի արհեստական պակասորդը կանխելու համար:
«Այո, սահմանամերձ շրջաններ վառելիքի մատակարարման հետ կապված որոշակի դժվարություններ կան անօդաչու թռչող սարքերի հարվածների սպառնալիքի պատճառով, և մենք նույնպես լուծում ենք այս հարցը»,- ասել է նա՝ հավելելով, որ որոշ ցանցային օպերատորների մոտ բենզինի գների բարձրացման վերաբերյալ բողոքների պատճառով պաշտոնյաներին հանձնարարել է «ուսումնասիրել գները»:
Կուրգանի շրջանում բենզալցակայաններում բենզինի և դիզելային վառելիքի վաճառքի սահմանափակումներ են մտցվել: Բնակավայրերում մեկ մեքենայի համար կվաճառվի ոչ ավելի, քան 40 լիտր բենզին և 80 լիտր դիզելային վառելիք, իսկ մայրուղային բենզալցակայաններում՝ մինչև 40 լիտր բենզին և մինչև 200 լիտր դիզելային վառելիք: Արգելվում է բենզին լցնել տարաները: Նահանգապետ Վադիմ Շումկովը հայտարարել է, որ այս միջոցառումները ներդրվում են «չափազանց մեծ պահանջարկի» և «խուճապի և սպեկուլյացիաների» կանխարգելման նպատակով:
Կուրսկի մարզում բենզալցակայաններում վառելիքը լիցքավորելու են միայն անմիջապես մեքենաների մեջ, որոշել է օպերատիվ շտաբը։ Տարածաշրջանի ղեկավար Ալեքսանդր Խինշտեյնը հայտարարել է, որ հանձնարարել է Դաշնային հակամենաշնորհային ծառայության տարածաշրջանային գրասենյակին «խստացնել գների բարձրացման վերահսկողությունը տարածաշրջանի բոլոր բենզալցակայաններում»: Նա հավելել է, որ «տարածաշրջանն ունի վառելիքի բավարար պաշարներ»:
ՌԲԿ-ի հաշվարկներով՝ հունիսի 23-ի դրությամբ՝ Ռուսաստանի ավելի քան 10 շրջաններում և բռնակցված Ղրիմում վառելիքի վաճառքի սահմանափակումներ են սահմանվել։
Մոսկվայի իշխանությունները թույլատրել են վառելիքի բեռնատարների վարորդներին մուտք գործել քաղաք առանց թույլտվության։ Նշվում է, որ այս ժամանակավոր միջոցը ներդրվում է Մոսկվայի և Մոսկվայի մարզի բենզալցակայանների ցանցերի սեփականատերերի խնդրանքով։
«Բենզալցակայաններին վառելիքի անխափան մատակարարումն ապահովելու համար վառելիքի բեռնատարների վարորդները կարող են քաղաք մուտք գործել 24/7 ռեժիմով և տեղաշարժվել առանց թույլտվության։ Բենզալցակայանների վարորդները չեն տուգանվի թույլտվություն չունենալու համար»,- հայտնել է Մոսկվայի տրանսպորտի դեպարտամենտը։
Ռուսաստանի շրջաններում և բռնակցված Ղրիմում վառելիքային ճգնաժամը ծագել է ուկրաինական բանակի կողմից ռուսական նավթային օբյեկտների վրա հարձակումների ֆոնին: Reuters-ի տվյալներով՝ Ուկրաինայի զինված ուժերի հարվածները դադարեցրել կամ կասեցրել են կենտրոնական Ռուսաստանի խոշոր նավթավերամշակման գործարանների գործունեությունը, ինչի արդյունքում հունիսի կեսերին Ռուսաստանում բենզինի արտադրության մոտ 25%-ը կորցրել է՝ համեմատած 2025 թվականի հունիսի միջին օրական ցուցանիշի հետ:
Թարգմանությունը՝ Էմմա Չոբանյանի