Անդրադարձ է կատարվել նաև Անիի կամրջի վերականգնման աշխատանքներին
ԵՐԵՎԱՆ, 24 հունիսի․/ԱՌԿԱ/․ ՀՀ տարածքային կառավարման և ենթակառուցվածքների նախարար Դավիթ Խուդաթյանն ու Թուրքիայի տրանսպորտի ու ենթակառուցվածքների նախարար Աբդուլքադիր Ուրալօղլու քննարկել են տարածաշրջանային կապուղիների զարգացման հնարավորությունները։
Այս մասին Խուդաթյանը գրել է Facebook–յան իր էջում։
«Բրյուսելում անցկացվող «Կապակցվածության օրակարգի հարթակ»-ի առաջին հանդիպման շրջանակներում երկկողմ հանդիպում եմ ունեցել Թուրքիայի տրանսպորտի ու ենթակառուցվածքների նախարար Աբդուլքադիր Ուրալօղլուի հետ։
Հանդիպման ընթացքում քննարկել ենք տարածաշրջանային կապուղիների զարգացման հնարավորությունները։ Երկուստեք կարևորել ենք երկաթուղային և ավտոմոբիլային հաղորդակցության ապաշրջափակման և անհրաժեշտ ենթակառուցվածքների ապահովմանն ուղղված աշխատանքները», – նշել է Խուդաթյանը։
Նա նաև հայտնել է, որ անդրադարձ է կատարվել նաև Անիի կամրջի վերականգնման աշխատանքներին։ Քննարկվել են երկուստեք հետաքրքրություն ներկայացնող այլ հարցեր։