Հունգարիայի կառավարությունը մտադիր է նախապատրաստել սահմանադրության փոփոխություններ, որոնք թույլ կտան պաշտոնանկ անել գործող նախագահ Տամաշ Շույոկին, հայտարարել է վարչապետ Պետեր Մագյարը ազգային խորհրդարանում ունեցած ելույթում։
Հունգարիայի վարչապետը վերահաստատել է Սույոկին պաշտոնանկ անելու իր վաղեմի մտադրությունը։ Վարչապետի խոսքով՝ գործող նախագահը «թույլ է տվել նախորդ կառավարության չարաշահումները» և, հետևաբար, չի կարող մնալ պաշտոնում։
«Մենք նախաձեռնում ենք Հանրապետության նախագահ Տամաշ Շույոկի պաշտոնանկությունը», – հայտարարել է Մագյարը։ «Սահմանադրության փոփոխությունների ուժի մեջ մտնելուց հաջորդ օրը Տամաշ Շույոկի լիազորությունները կդադարեցվեն, վերջ»։
Վարչապետը նաև հայտարարել է, որ մինչև նոր սահմանադրության մշակման ավարտը խորհրդարանը կընտրի ժամանակավոր նախագահ։ Նրա հիմնական խնդիրը կլինի «Հանրապետության նախագահի ինստիտուտի լիազորությունների վերականգնումը»։
Բացի այդ, կառավարությունը կմշակի փոփոխություններ, որոնք կսահմանափակեն խորհրդարանական պատգամավորների լիազորությունների ժամկետը մինչև 12 տարի և կփոխեն Գերագույն դատարանի ընտրության կարգը: Այս միջոցառումները, ըստ կաբինետի, նպատակ ունեն ամրապնդել ժողովրդավարական ինստիտուտները և կանխել իշխանության կենտրոնացումը որոշակի քաղաքական ուժերի ձեռքում: