ԱՄՆ նախագահ Դոնալդ Թրամփը մտադիր է առաջարկել ամերիկյան պաշտպանական ընկերություններին կազմակերպել սպառազինության լիցենզավորված արտադրություն Եվրոպայում և Ուկրաինայում։ Այս մասին հայտնում է Bloomberg-ը՝ հղում անելով իրազեկ աղբյուրներին։
Նախաձեռնության պատճառը հակաօդային պաշտպանության համակարգերի համար նախատեսված հրթիռների սուր պակասն է, որոնց կարիքը հատկապես մեծ է Ուկրաինայում՝ ռուսական բալիստիկ հրթիռային հարվածներին դիմակայելու համար։ Աղբյուրների տվյալներով՝ ԱՄՆ-ի սեփական պաշարները զգալիորեն կրճատվել են Իրանի հետ հակամարտության ընթացքում, իսկ երկրի ներսում արտադրության ծավալների արագ մեծացումը ժամանակատար գործընթաց է։
Ֆրանսիայում անցկացված G7-ի գագաթնաժողովի շրջանակում Թրամփը լրագրողներին հայտնել է, որ իր վարչակազմը պատրաստ է քննարկել համապատասխան լիցենզիաների տրամադրման հարցը։
Գերմանիայի կանցլեր Ֆրիդրիխ Մերցն էլ հաստատել է, որ «կոնկրետ լիցենզիաները մանրամասն կքննարկվեն մասնակից երկրների միջև»։ Սա ենթադրում է, որ ամերիկյան ընկերությունները կարող են եվրոպական արտադրողներին տրամադրել ռազմական տեխնիկայի և սպառազինության արտադրության համար անհրաժեշտ համապարփակ լիցենզիաներ։
Bloomberg-ի փոխանցմամբ՝ G7-ի առաջնորդներն արդեն համաձայնել են ավելացնել Ուկրաինային տրամադրվող հակաօդային պաշտպանության համակարգերի մատակարարումները և քննարկում են հրթիռների արտադրությունը անմիջապես Ուկրաինայի տարածքում կազմակերպելու հնարավորությունը։