Թեհրանը հայտարարել է, որ տարածաշրջանում լարվածության աճի պայմաններում ԱՄՆ-ի հետ դիվանագիտական գործընթացի շարունակությունը հարցականի տակ է։
Իրանի արտաքին գործերի նախարարության ներկայացուցիչ Էսմայիլ Բաղային հայտարարել է, որ ԱՄՆ-ի հետ բանակցությունները չեն կարող առաջընթաց գրանցել հրադադարի շարունակական խախտումների և տարածաշրջանային իրավիճակի սրման ֆոնին։
Նրա խոսքով՝ Վաշինգտոնը խաթարում է բանակցային գործընթացը «հակասական հայտարարություններով, փոփոխվող դիրքորոշումներով և գործողություններով», մինչդեռ Իսրայելը, ըստ Բաղայիի, ավելի է սրում իրավիճակը՝ պարբերաբար խախտելով Լիբանանում գործող հրադադարի պայմանները։
«Անցած գիշերվա իրադարձություններից հետո մենք պետք է վերանայենք ԱՄՆ-ի հետ դիվանագիտական ուղին։ Ցանկացած բանակցային գործընթաց պահանջում է առնվազն կայուն միջավայր»,-ընդգծել է Իրանի ԱԳՆ ներկայացուցիչը։
Թեհրանում նշում են, որ հետագա բանակցությունների ճակատագիրը կախված կլինի տարածաշրջանում անվտանգության իրավիճակի զարգացումներից և կողմերի գործողություններից։