ԵՐԵՎԱՆ, 8 հունիսի․/Նովոստի-Արմենիա/․ Ղազախստանի նախագահ Կասիմ-Ժոմարտ Տոկաևը և Վրաստանի վարչապետ Իրակլի Կոբախիձեն շնորհավորել են Հայաստանի վարչապետ Նիկոլ Փաշինյանին՝ խորհրդարանական ընտրություններում նրա գլխավորած «Քաղաքացիական պայմանագիր» կուսակցության հաղթանակի առթիվ։
Ղազախստանի նախագահի շնորավորանքը
«Միջազգային դիտորդների մեծամասնության նախնական տվյալների համաձայն՝ ընտրություններն անցկացվել են երկրի գործող ընտրական օրենսդրությանը համապատասխան՝ բաց և քաղաքացիների կամքը արտահայտելու համար բավարար պայմաններով», – նշված է «Ակորդա»ի տարածած հայտարարության մեջ։
Կասիմ-Ժոմարտ Տոկաևը Նիկոլ Փաշինյանին մաղթել է շարունակական հաջողություններ իր աշխատանքում՝ ի պաշտպանություն Հայաստանի երկարաժամկետ ազգային շահերի։
Տոկաևը նշել է, որ Ղազախստանը պատրաստ է շարունակել ակտիվ համագործակցությունը բարեկամ Հայաստանի հետ փոխադարձ հետաքրքրություն ներկայացնող բոլոր ոլորտներում։
Պետության ղեկավարը հայ ժողովրդին մաղթել է հաջողություններ իր երկրի զարգացման գործում, խաղաղություն և բարգավաճում։
Վրաստանի վարչապետի շնորհավորանքը
«Սրտանց շնորհավորում եմ վարչապետ Նիկոլ Փաշինյանին ընտրություններում իր կուսակցության հաջողության կապակցությամբ»,- գրել է Կոբախիձեն X-ի իր էջում։
Նա նշել է, որ անհամբեր սպասում է իրենց սերտ համագործակցության շարունակությանը՝ Վրաստանի և Հայաստանի միջև ռազմավարական գործընկերությունն ու բարեկամական հարաբերությունները ամրապնդելու համար՝ հանուն երկու ազգերի բարգավաճման։
Ընտրությունների մասին
Հունիսի 7-ին Հայաստանում 2005 ընտրատեղամասերում տեղի են ունեցել 9-րդ գումարման Ազգային ժողովի հերթական ընտրությունները։
ԿԸՀ տեղեկատվության համաձայն՝ Հայաստանի ընտրողների ռեգիստրում ընդգրկված է 2 503 974 մարդ։ Մասնակցությունը ժամը 20:00-ի դրությամբ կազմել է 58,97%:
Խորհրդարանական ընտրությունների համար մասնակցության նվազագույն շեմ սահմանված չէ։ Սա նշանակում է, որ ընտրությունները համարվում են կայացած՝ անկախ քվեարկությանը մասնակցած քաղաքացիների թվից։
Հայաստանի Ազգային ժողովի ընտրություններում պատգամավորական մանդատների բաշխմանը թույլատրվում են այն կուսակցություններն ու դաշինքները, որոնք հաղթահարել են օրենքով սահմանված անցողիկ շեմը. կուսակցությունների համար՝ 4%, երկու կուսակցությունից կազմված դաշինքների համար՝ 8%, երեք և ավելի կուսակցություններից կազմված դաշինքների համար՝ 10%։
Ընտրություններին մասնակցել է 18 քաղաքական ուժ՝ 2 դաշինք և 16 կուսակցություն. Ռեֆորմիստների կուսակցություն, «Բոլորին դեմ եմ» դեմոկրատական կուսակցություն, «Ուժեղ Հայաստան» դաշինք, Հայաստանի Շնորհապետական կուսակցություն, «Նոր ուժ» ռեֆորմիստական կուսակցություն, «Միասնության թևեր» կուսակցություն, «Բարգավաճ Հայաստան» կուսակցություն, «Ազգային-ժողովրդավարական բևեռ» համահայկական կուսակցություն, «Քոչարի՝ ազգային վերածնունդ և ազգի զարթոնք» կուսակցություն, «Հայ ազգային կոնգրես» կուսակցություն, «Հանրապետություն» կուսակցություն, Քրիստոնեա-դեմոկրատական կուսակցություն, «Ժողովրդավարական համախմբում» կուսակցություն, «Դեմոկրատիա, օրենք, կարգապահություն» կուսակցություն (ԴՕԿ), «Քաղաքացիական պայմանագիր» կուսակցություն, «Հայաստան» կուսակցությունների դաշինք, «Հանուն Հանրապետության՝ ժողովրդավարության պաշտպաններ» կուսակցություն, «Լուսավոր Հայաստան» կուսակցություն։