Իսրայելն ու Լիբանանը համաձայնել են հրադադար պահպանել՝ պայմանով, որ «Հըզբոլլահ» խմբավորման հարձակումները լիովին դադարեցվեն, հայտարարել է ԱՄՆ Պետդեպարտամենտը երկու երկրների ներկայացուցիչների միջև Վաշինգտոնի միջնորդությամբ անցկացված բանակցություններից հետո։
«ԱՄՆ-ի գլխավորությամբ բանակցությունների արդյունքում Իսրայելն ու Լիբանանը համաձայնել են հրադադարի։ Սա կախված է Հեզբոլլահի կողմից հրադադարի ամբողջական հաստատումից և «Հըզբոլլահի» բոլոր մարտիկների տարհանումից Լիտանի գետի հարավային հատվածից», – ասվում է Պետդեպարտամենտի հայտարարության մեջ։
Կողմերը նաև համաձայնել են ստեղծել փորձնական գոտիներ, որոնք ամբողջությամբ կվերահսկվեն լիբանանյան ուժերի կողմից։
«Իսրայելը և Լիբանանը հաստատել են միմյանց նկատմամբ թշնամական մտադրությունների բացակայությունը և հանձնառու են շարունակել ուղիղ բանակցությունները՝ վստահություն կառուցելու, բոլոր չլուծված հարցերը լուծելու և երկու երկրների միջև համապարփակ համաձայնագրի հասնելու ուղղությամբ աշխատելու համար», – հայտարարել է ԱՄՆ Պետդեպարտամենտը։
Նրանք հայտնել են, որ Իսրայելն ու Լիբանանը համաձայնել են «վերսկսել քաղաքական և անվտանգության վերաբերյալ քննարկումները հունիսի 22-ից սկսվող շաբաթվա ընթացքում՝ համապարփակ համաձայնագրի հասնելու նպատակով»։
ԱՄՆ-ն նաև համաձայնել է «շարունակել կողմերի միջև շփումները այդ ընթացքում»։
Լիբանանը և Իսրայելը ապրիլին համաձայնել են հրադադարի։ Լիբանանյան բանակը չի մասնակցել Իսրայելի հետ հակամարտությանը. մարտերը վարել է «Հըզբոլլահ»-ը, որը հրադադարի կողմ չէ։