ԱԺ նախկին պատգամավոր, ԱԺ մարդու իրավունքների հանձնաժողովի նախկին նախագահ Նաիրա Զոհրաբյանն այսօր՝ փետրվարի 5-ին, ԱԺ շենքի դիմաց կազմակերպված ցույցի ժամանակ ելույթ ունենալիս հռետորական հարց ուղղեց ՀՀ ԱԺ շենքում հյուրընկալված Եվրոպայի խորհրդի մարդու իրավունքների հանձնակատար Մայքլ Օ’Ֆլահերթիին, թե ՀՀ ԱԺ շենք գալուց առաջ այցելե՞լ է Հայաստանում որևէ քաղբանտարկյալի, քաղաքական նպատակներով կալանավորված չորս սրբազաններից որևէ մեկին, անվասալյակով դատարան բերված Նարեկ Սամսոնյանին, որը Վազգեն Սաղաթելյանի հետ արդեն երկու ամսից ավելի կալանքի տակ է՝ բառի, խոսքի համար, Խաչիկ Գալստյանին, այսօր այցելելո՞ւ է դատարան՝ «18 արդարների» դատին․ «Առանց իրեն հարցնելու, կարող եմ ասել՝ ոչ»։
Նաիրա Զոհրաբյանը խայտառակություն որակեց մեկ շաբաթ առաջ ԵԽ ընդունած բանաձևը, որտեղ որևէ խոսք չկար Հայաստանում քաղբանտարկյալների մասին, մինչդեռ ինքը 2012 թվականին կողմ է քվեարկել այն հինգ դրույթներին, որոնցով այսօր Հայաստանում տասնյակ քաղաքացիներ քաղաքական հետապնդյալներ են։
Նա հիշեց, որ ժամանակին ԵԽ մարդու հանձնակատարներն իր հետ անգամ ՔԿՀ-ների «կաթսայի կափարիչներն էին բացում, որ կալանավորների կարագի դոզան ստուգեն»։ «Ես չեմ ուզում, որ Եվրոպան տարածաշրջանում ՌԴ-ի հետ իր «մարդաբոյը» լուծի Հայաստանում մարդու իրավունքների վրա աչք փակելով»,- ասաց Նաիրա Զոհրաբյանը։
Հիշեցնենք, որ այսօր ԱԺ շենքի դիմաց ցույց էր կազմակերպվել էր Եվրոպայի խորհրդի մարդու իրավունքների հանձնակատար Մայքլ Օ’Ֆլահերթիի՝ ՀՀ խորհրդարան այցի առիթով։ Ցույցի մասնակիցները Հայաստանում և Բաքվում հայ քաղբանտարկյալների նկարներով էին և Հայաստանի քաղբանտարկյալներին ու «Ալիևի բանտարկյալներին» ազատ արձակելու կոչերով պաստառներով։ Ցույցին մասնակցում էին տարբեր քաղաքական ուժերի ներկայացուցիչներ, քաղաքացիներ։