«Փաստերի ստուգման հարթակի» տրամադրության տակ է հայտնվել ՀՀ Ազգային ժողովի ընտրություններում պատգամավորի թեկնածու Նարեկ Կարապետյանի ՌԴ քաղաքացիության մակնշմամբ կնքված և էլեկտրոնային ստորագրությամբ փաստաթուղթ։
Այն վկայում է՝ Կարապետյանը 2026 թվականի մայիսի 19-ի դրությամբ ՌԴ քաղաքացիություն է ունեցել։
Հիշեցնենք, որ մայիսի 19-ի երեկոյան ԱԺ նախագահ Ալեն Սիմոնյանը Ռուսաստանի իրավաբանական անձանց միասնական պետական գրանցամատյանից փաստաթղթեր հանրայնացրեց, որոնք վերաբերում են «Մոսպրոմէքսպլուատացիա» սահմանափակ պատասխանատվությամբ ընկերությանը։ Էկրանապատկերներում, որոնք հրապարակել էր Սիմոնյանը, երևում է, որ Նարեկ Կարենի Կարապետյանը նշված ընկերության բաժնետեր է և ունի ՌԴ քաղաքացիություն։
Մայիսի 20-ին ՀՀ քննչական կոմիտեն հայտարարություն տարածեց, համաձայն որի՝ Ազգային Ժողովի պատգամավորի թեկնածու, «Ուժեղ Հայաստան» կուսակցության ցուցակի առաջին համար Նարեկ Կարապետյանը թաքցրել է օտար պետության քաղաքացիություն ունենալու մասին տեղեկությունը, ինչի հիմքով ՀՀ ՆԳՆ-ն հանցագործության մասին հաղորդում է ներկայացրել ՔԿ։
Նույն օրը Կարապետյանը ֆեյսբուքյան գրառմամբ հերքել էր այդ պնդումները։ Որպես աջակցություն Կարապետյանին, ՌԴ արտաքին գործերի փոխնախարար Միխայիլ Գալուզինը նույնպես հայտարարել էր, թե Նարեկ Կարապետյանը ՌԴ քաղաքացի չէ և երբևէ չի ունեցել ՌԴ քաղաքացիություն։
Կարապետյանի այդ հայտարարությունից հետո, սակայն, Սիմոնյանը մեկ այլ ֆեյսբուքյան եթերով հայտնեց, որ Ռուսաստանի իրավաբանական անձանց միասնական պետական գրանցամատյանում Կարապետյանի վերաբերյալ հին տվյալները հեռացվել են՝ համապատասխան հղումը որոշ ժամանակ անհասանելի է եղել, ապա դրանց խմբագրված տարբերակն է հրապարակվել գրանցամատյանում։
Տեղեկանքում արդեն նշվում է, որ Նարեկ Կարապետյանը ոչ թե Ռուսաստանի, այլ Հայաստանի քաղաքացի է։ Փոփոխությունը կատարվել է մայիսի 20-ին։
Ինչի՞ մասին է վկայում փաստաթուղթը
FIP.am-ի տրամադրության տակ է հայտնվել 2026 թվականի մայիսի 19-ով թվագրված Նարեկ Կարապետյանի ՌԴ քաղաքացիության մակնշմամբ փաստաթուղթ (էջ 3) կնիքով և էլեկտրոնային ստորագրությամբ։
Արտապատկերումը՝ փաստաթղթից
Ռուսաստանում յուրաքանչյուր հարկ վճարող ունի հարկ վճարողի հաշվառման համար (ՀՎՀՀ), այդ թվում՝ օտարերկրացիները։ Կա առցանց ծառայություն, որը օգնում է որոշել ՀՎՀՀ-ն՝ հիմնվելով անձնական տվյալների վրա։ Դրա միջոցով որոշվել է Կարապետյանի ՀՎՀՀ-ն՝ 772836376910։ Հարցման արդյունքում համակարգը կտրամադրի այսպիսի փաստաթուղթ՝ էլեկտրոնային ստորագրությամբ՝ աղբյուրը Ռուսաստանի Դաշնության պետական գործակալություն։
Ռուսաստանը վարում է նաև իրավաբանական անձանց հատուկ միասնական պետական գրանցամատյան՝ EGRUL հարթակը: Ըստ պահանջի, այն տրամադրում է հարցվող իրավաբանական անձի ներկայիս կարգավիճակը:
2026 թվականի մայիսի 19-ին թվագրված փաստաթուղթը Իրավաբանական անձանց միասնական պետական գրանցամատյանից ստացված իրական քաղվածք է, որը վավերացված է Դաշնային հարկային ծառայության (FTS) էլեկտրոնային ստորագրությամբ, որի ստուգման արձանագրությունը ևս մեր տրամադրության տակ է։
Ստորագրությունը հնարավոր է ստուգել egrul.nalog.ru հարթակում և կրկնակի ստուգել այն՝ օգտագործելով e-trust ծառայությունը։
Փաստաթղթերը վկայում են՝ Կարապետյանը առերևույթ խախտել է Սահմանադրության պահանջը
FIP.am-ի ձեռքի տակ հայտնված փաստաթղթերը վկայում են՝ Նարեկ Կարապետյանը վերջին չորս տարում առերևույթ ունեցել է նաև այլ երկրի՝ այս դեպքում ՌԴ-ի քաղաքացիություն, ինչը անթույլատրելի է ՀՀ ԱԺ պատգամավորի մանդատին հավակնելու սահմանադրական պահանջի տեսանկյունից։
ՀՀ սահմանադրության 48-րդ հոդվածով սահմանված պահանջը, համաձայն որի Ազգային ժողովի պատգամավոր կարող է ընտրվել քսանհինգ տարին լրացած, վերջին չորս տարում միայն Հայաստանի Հանրապետության քաղաքացի հանդիսացող, վերջին չորս տարում Հայաստանի Հանրապետությունում մշտապես բնակվող, ընտրական իրավունք ունեցող և հայերենին տիրապետող յուրաքանչյուր ոք:
Այսպես, EGRUL գրանցամատյանը տրամադրում է հարկ վճարողի հարցումն իրականացնելու պահի կարգավիճակը, բայց ոչ փոփոխությունների պատմությունը․ FIP.am-ին, հասանելի են դարձել գրանցամատյանում Կարապետյանի վերաբերյալ նախկին գրառումներից արխիվացված փաստաթղթերը ևս։
FIP.am-ի ձեռք տակ են հայտնվել 2023-ից 2026 թվականների՝ Նարեկ Կարապետյանի Ռուսաստանի քաղաքացիություն ունենալու մասին վկայող չորս փաստաթուղթ․ համաձայն դրանց՝ Կարապետյանը ՌԴ քաղաքացիություն է ունեցել առնվազն 2023 թվականից։
Այսպես, օգտագործելով Կարապետյանի ՀՎՀՀ-ն՝ տեղեկանում ենք, որ նա համարվում է «Մոսպրոմէքսպլուատացիա» ՍՊԸ-ի հիմնադիրը 2020 թվականի օգոստոսի 18-ից մինչ այս պահը: Նա նաև «ՎՈԻԳ»/«ВОИГ» ՍՊԸ-ի հիմնադիրն էր՝ 2023 թվականի մարտի 29-ից մինչև 2026 թվականի մարտի 30-ը։
Արտապատկերումը՝ փաստաթղթերից
2020 թվականի օգոստոսի 18-ին, երբ Նարեկ Կարապետյանը դարձել է «Մոսպրոմէքսպլուատացիա» ՍՊԸ-ի հիմնադիրը, նրա քաղաքացիության մասին տվյալներ չէին նշվում, քանի որ ՌԴ Իրավաբանական անձանց միասնական պետական գրանցամատյանը այդ ժամանակ պարզապես նման տվյալներ չէր պահանջում:
Քաղաքացիության մասին պահանջի պարտադիր դառնալուց հետո, հիմնադիրների քաղաքացիության մասին տվյալները սկսեել են հայտնվել գրառումների թարմացումներում։ Արդեն 2023 թվականի հուլիսի 27-ին հայտնվել է Նարեկ Կարապետյանի քաղաքացիության մասին տվյալը։
Ծառայությունը նաև հաղորդում է գրառման փոփոխության պատճառը. «Ավելացվել է հիմնադիր Նարեկ Կարենովիչ Կարապետյանի հարկ վճարողի նույնականացման համարի (ՀՎՀՀ) մասին տեղեկատվություն՝ 772836376910»:
Փաստացի, 2023 թվականի հուլիսին 27-ի քաղվածքի արխիվացված պատճենում երևում են Կարապետյանի թե՛ ՀՎՀՀ-ն, թե՛ քաղաքացիությունը՝ «Ռուսաստանի Դաշնության քաղաքացի»:
Այսինքն՝ ռուսական պետական մարմինների գրառումների համաձայն՝ Նարեկ Կարապետյանը Ռուսաստանի քաղաքացիություն է ունեցել 2023 թվականի հուլիսի 27-ի դրությամբ։
Նարեկ Կարապետյանի՝ Ռուսաստանի քաղաքացի լինելու մասին վկայող մյուս երեք փաստաթղթերը թվագրվում են 2023 թվականի հոկտեմբերի 17, 2025 թվականի հունիսի 24 և 2026 թվականի մայիսի 19։
Այսպիսով, մեր ձեռքի տակ հայտնված փաստաթղթերից մեկը, որն ունի ստուգված էլեկտրոնային ստորագրություն, վկայում է, որ Կարապետյանը 2026 թվականի մայիսի 19-ի դրությամբ ունեցել է ՌԴ քաղաքացիություն։
Հատկանշական է, որ այս գրառումը հեռացվել է ՌԴ պետակական գերատեսչության հարթակից այն բանից հետո, երբ Կարապետյանի քաղաքացիության մասին լուրեր շրջանառվեցին մամուլում և Ալեն Սիմոնյանի կողմից։
Հայտնի է նաև, որ հարթակը այդ աղմկահարույց լուրերից հետո հեռացրել է գրառումը, թարմացրել այն նոր տարբերակով՝ փոխելով Կարապետյանի քաղաքացիության մասին տվյալը և նշելով՝ «Հայաստանի Հանրապետության քաղաքացի»։
Կարդացեք նաև՝ Սամվել Կարապետյանը տարիներ շարունակ երկքաղաքացի է եղել ՀՀ Սահմանադրության խախտմամբ (բացառիկ փաստաթղթեր)
Նանե Մանասյան
Ռոման Ուդոտ
The post 2026 թվականի մայիսի 19-ի դրությամբ կնքված փաստաթուղթ՝ Նարեկ Կարապետյանի ՌԴ քաղաքացիության մակնշմամբ appeared first on FIP.AM.