Հայաստանում սպառողական գնաճը շարունակում է աճել։ Հայաստանի վիճակագրական կոմիտեի տվյալներով՝ 2026 թվականի առաջին ամիսներին արձանագրվել է գնաճի կայուն արագացում, իսկ փորձագիտական շրջանակներում նշվում է, որ Ռուսաստանի հետ տնտեսական կապերի հնարավոր խզման դեպքում իրավիճակը կարող է էլ ավելի բարդանալ։
Հունվարին, նախորդ տարվա նույն ժամանակահատվածի համեմատ, սպառողական գնաճը կազմել է 3,8%, փետրվարին՝ 4,3%, մարտին՝ 4,5%, իսկ ապրիլին արդեն հասել է 5,3%-ի։
Սննդամթերքի ոլորտում աճն ավելի բարձր է եղել։ Հունվարին պարենային գնաճը կազմել է 5,8%, փետրվարին՝ 6,5%, մարտին՝ 7,8%, իսկ ապրիլին արդեն՝ 9,7%՝ մոտենալով երկնիշ ցուցանիշի։
Ապրիլին տավարի և հորթի միսը թանկացել է 20,5%-ով, խոզի միսը՝ 12,5%-ով, իսկ գառան և այծի միսը՝ 14,9%-ով։ Սառեցված ձկան գներն աճել են 22,5%-ով, իսկ չորացված, աղ դրած և ապխտած ձկնամթերքինը՝ ռեկորդային 42,7%-ով։
Այս ֆոնին 2026 թվականի առաջին եռամսյակում Հայաստանի գյուղատնտեսության համախառն արտադրանքի ծավալը նախորդ տարվա նույն ժամանակահատվածի համեմատ նվազել է 5,2%-ով, այդ թվում՝ բուսաբուծության ոլորտում՝ 16,6%-ով։
Փորձագետների գնահատմամբ՝ եթե ընտրություններից հետո իշխանությունները գնան Ռուսաստանի հետ տնտեսական կապերի կտրուկ վերանայման կամ խզման ճանապարհով, ապա գնաճային ճնշումները կարող են ավելի ուժեղանալ՝ ազդելով առաջին հերթին սննդամթերքի և ներմուծվող ապրանքների շուկայի վրա։