Իրանը հայտարարել է, որ ուսումնասիրում է Մերձավոր Արևելքում պատերազմը դադարեցնելուն ուղղված ԱՄՆ-ի նոր առաջարկը, մինչդեռ նախագահ Դոնալդ Թրամփը բանակցությունները որակել է որպես համաձայնագրի և վերսկսված հարվածների «սահմանագիծ», գրում է France 24-ը։
Թրամփը, որն ավելի վաղ հայտարարել էր, որ բանակցությունները գտնվում են «վերջնական փուլում», ավելի ուշ զգուշացրել էր, որ դիվանագիտության պատուհանը կարող է արագ փակվել։
«Դա հենց սահմանագծին է, հավատացեք ինձ։ Եթե մենք չստանանք ճիշտ պատասխաններ, ամեն ինչ շատ արագ կընթանա։ Մենք բոլորս պատրաստ ենք սկսել»,- լրագրողներին ասել է Թրամփը Վաշինգտոնի մոտ գտնվող Էնդրյուսի բազայում։
Նա նշել է, որ համաձայնագիրը կարող է կնքվել «շատ արագ» կամ «մի քանի օրվա ընթացքում», սակայն զգուշացրել՝ Թեհրանը պետք է տրամադրի «100 տոկոսով լավ պատասխաններ»։
Իրանի ԱԳՆ խոսնակ Էսմայիլ Բաղային հայտնել է, որ Թեհրանը «ստացել է ամերիկյան կողմի տեսակետները» և ուսումնասիրում է դրանք։ Նա կրկնել է Իրանի պահանջները սառեցված ակտիվների ազատման և իրանական նավահանգիստների ԱՄՆ-ի կողմից շրջափակման դադարեցման վերաբերյալ։
Ավելի վաղ Թեհրանի գլխավոր բանակցող Մոհամմադ Բաղեր Ղալիբաֆը Վաշինգտոնին մեղադրել էր պատերազմը վերսկսելու փորձերի մեջ, այն բանից հետո, երբ Թրամփը սպառնացել էր նոր հարձակումներով, եթե Իրանը չհամաձայնվի գործարքի։ Ղալիբաֆը զգուշացրել էր «ուժեղ պատասխանի» մասին, մինչդեռ Իրանի Իսլամական հեղափոխության պահապանների կորպուսը հայտարարել էր, որ ցանկացած վերսկսված հակամարտություն կտարածվի Մերձավոր Արևելքի սահմաններից շատ ավելի հեռու։
«Թշնամու գործողությունները՝ թե՛ բացահայտ, թե՛ գաղտնի, ցույց են տալիս, որ չնայած տնտեսական և քաղաքական ճնշմանը՝ այն չի հրաժարվել իր ռազմական նպատակներից և ձգտում է նոր պատերազմ սկսել»,- ասել է Ղալիբաֆը։
Ապրիլի 8-ի հրադադարը դադարեցրել է Իրանի, ԱՄՆ-ի և Իսրայելի միջև բաց մարտական գործողությունները։ Թրամփը բազմիցս սպառնացել է վերսկսել ռազմական գործողությունները, իրանցի պաշտոնյաներն էլ պատասխանել են սեփական նախազգուշացումներով։
Մինչ այդ, Պակիստանի միջնորդությամբ փոխանակումները շարունակվում են՝ պատերազմի պաշտոնական ավարտն ապահովելու նպատակով։ Իրանի պաշտոնական IRNA լրատվական գործակալությունը, հղում անելով դիվանագիտական աղբյուրներին, հայտնել է, որ Պակիստանի ներքին գործերի նախարարը ժամանել է Թեհրան՝ մեկ շաբաթից էլ պակաս ժամանակում երկրորդ այցով։ Սաուդյան Արաբիայի արտաքին գործերի նախարար, արքայազն Ֆեյսալ բին Ֆարհանը գովաբանել է Թրամփին «դիվանագիտությանը հնարավորություն տալու» որոշման համար և կոչ արել Իրանին օգտվել «հնարավորությունից՝ խուսափելու լարվածության վտանգավոր հետևանքներից»։
Իսրայելի բանակի գլխավոր հրամանատար Էյալ Զամիրն էլ հայտարարել է, որ բանակը շարունակում է մնալ ամենաբարձր պատրաստվածության մակարդակի վրա և «պատրաստ է ցանկացած զարգացման»։
Հրադադարը դադարեցրել է մարտական գործողությունները, բայց չի վերաբացել Հորմուզի նեղուցը՝ կենսականորեն կարևոր ջրային ուղին, որը սովորաբար տեղափոխում է աշխարհի նավթի և հեղուկ բնական գազի մոտ մեկ հինգերորդը։
Իրանի Իսլամական հեղափոխության պահապանների նավատորմը հայտարարել է, որ նախորդ 24 ժամվա ընթացքում թույլատրել է 26 նավի, այդ թվում՝ նավթատարների, անցնել Հորմուզով, «համակարգում և անվտանգություն» ապահովելուց հետո։ Միացյալ Նահանգները հակաշրջափակում է սահմանել իրանական նավահանգիստների նկատմամբ։ ԱՄՆ Կենտրոնական հրամանատարությունը հայտարարել է, որ ծովային հետևակը չորեքշաբթի Օմանի ծոցում բարձրացել է իրանական նավթատարը՝ սահմանափակումները խախտելու փորձ կատարելու կասկածանքով։ Խուզարկվելուց հետո նավն ազատ է արձակվել, դրան հրահանգվել է փոխել ուղղությունը։ Նշվում է, որ շրջափակման սկսվելուց ի վեր ԱՄՆ ուժերը վերահասցեագրել են 91 առևտրային նավ։
Թարգմանությունը՝ Էմմա Չոբանյանի