ԱՄՆ Օքլենդի (Քալիֆորնիա) դաշնային դատարանը մերժել է ամերիկացի միլիարդատեր Իլոն Մասկի աղմկահարույց դատական հայցը OpenAI-ի և դրա գործադիր տնօրեն Սեմ Ալթմանի դեմ: Այս մասին հաղորդում են Reuters-ը և Associated Press-ը, փոխանցում է DW-ի ռուսական ծառայությունը:
Ինը ատենակալներ միաձայն որոշել են, որ Մասկը չափազանց երկար է հետաձգել հայցի ներկայացումը և բաց է թողել օրենքով սահմանված ժամկետը։
Դատաքննությունը տևել է երեք շաբաթ, սակայն վճռից առաջ ատենակալների խորհրդակցությունները տևել են երկու ժամից էլ պակաս։ Ատենակալները խորհրդատվական դեր են կատարել, սակայն, ի վերջո, դատավոր Իվոն Գոնսալես Ռոջերսը նույնպես մերժել է Մասկի պնդումները։
Իլոն Մասկը OpenAI-ի համահիմնադիրն է, որը գործարկվել է 2015 թվականին և ավելի ուշ ստեղծել ChatGPT-ն։ Ընկերության գործունեության սկզբնական տարիներին Մասկը ներդրել է 38 միլիոն դոլար։ Ավելի ուշ նա OpenAI-ի գործադիր տնօրեն Ալթմանին և նրա առաջին տեղակալ Գրեգ Բրոքմանին մեղադրել է ընկերության առաքելությունն իր մեջքի հետևում փոխելու մեջ՝ այն վերափոխելով շահույթ հետապնդող ձեռնարկության։
Մասկը սոցիալական ցանցերում գրառում է արել, որ բողոքարկելու է որոշումը։ Նա պնդում է, որ դատավորն ու ատենակալները չեն քննարկել գործի էությունը՝ փոխարենը կենտրոնանալով դատական հայց ներկայացնելու «պաշտոնական օրացույցի» վերջնաժամկետների վրա։
«Նրանց համար, ովքեր ուշադիր հետևել են այս գործին, կասկած չկա, որ Ալթմանը և Բրոքմանն իսկապես հարստացել են՝ գողանալով բարեգործական հիմնադրամից միջոցներ։ Միակ հարցն այն է, թե Ե՞ՐԲ են նրանք դա արել»,- նշել է միլիարդատերը։
Ալթմանը, իր հերթին, պնդում է, որ Մասկն աջակցել է OpenAI-ի առևտրային ընկերության վերափոխմանը և ծրագրում է ապագայում վերահսկել այն։
2018 թվականին Մասկը հրաժարական տվեց OpenAI-ի տնօրենների խորհրդից և սկսեց մշակել իր սեփական նախագծերը։ Դրանցից մեկը ChatGPT-ի մրցակից X սոցիալական ցանցում արհեստական բանականության Grok չաթբոտն է։
Մասկի հեռանալուց հետո OpenAI-ը ֆինանսավորում է ներգրավել Microsoft-ից և վաճառել բաժնետոմսերի մի մասը։ Այնուհետև ընկերությունը շուկա է մուտք գործել ChatGPT-ի միջոցով՝ վաստակելով միլիարդավոր դոլարներ։
Հայցում Մասկի փաստաբանները ենթադրել էին, որ OpenAI-ը ներկայում գնահատվում է մոտավորապես 500 միլիարդ դոլար։ Մասկը պնդում է, որ սա իր ներդրումներից ստացված անօրինական շահույթ է, հետևաբար, պահանջել է, որ OpenAI-ն իրեն վճարի 65,6 միլիարդից մինչև 109,43 միլիարդ դոլար, իսկ Microsoft-ը՝ 13,3 միլիարդից մինչև 25,06 միլիարդ դոլար։
Թարգմանությունը՝ Էմմա Չոբանյանի