Նոր փոփոխությամբ՝ օտարերկրյա պետությունում ծառայության գործուղված դիվանագետ ամուսիններից 2-ն էլ կստանան աշխատավարձի 100 տոկոսը։
ԵՐԵՎԱՆ, 11 մայիսի – Sputnik․ Հայաստանում և օտարերկրյա պետություններում ծառայություն իրականացնող դիվանագետների աշխատավարձերը հավասարեցվեցին։ Այսօր ՀՀ ԱԺ-ն երկրորդ ընթերցմամբ և ամբողջությամբ ընդունեց ՀՀ ԱԳ նախարարության ներկայացրած «Դիվանագիտական ծառայության մասին» ՀՀ օրենքում փոփոխություններ կատարելու մասին նախագիծը։
Խորհրդարանի ընդունած նախագծով որոշ երկրներում կբացվեն դիվանագիտական գրասենյակներ։ Միրզոյանի խոսքով՝ լինում են դեպքեր, երբ օտարերկրյա պետությունում անհրաժեշտ է լինում ունենալ պետության ներկայացվածություն, սակայն այդ ժամանակահատվածում ֆինանսական կամ այլ տեսանկյունից նպատակահարմար չի լինում դեսպանության ստեղծումը: Նման դեպքերում օտարերկրյա պետության հետ կարող է ձեռք բերվել համաձայնություն դիվանագիտական գրասենյակ հիմնելու մասին:
Մեկ այլ կարգավորում վերաբերում է դիվանագետ ամուսինների աշխատավարձերին: Ըստ նախկինում գործող կարգավորման՝ դիվանագետ ամուսինները, երբ գործուղվում են օտարերկրյա պետություն ծառայության, նրանցից մեկը ստանում է աշխատավարձի ընդամենը 50 տոկոսը: Միրզոյանի խոսքով՝ սա ևս վաղուց իրեն սպառած և աբսուրդ կարգավորում է, քանի որ երկու դիվանագետն էլ իրականացնում են 100 տոկոսով ծառայություն, ուստի պետք է վճարվեն 100 տոկոսով։