ԱՄՆ-ի հետ պատերազմը դադարեցնելու և Հորմուզի նեղուցը վերաբացելու Իրանի առաջարկն օրինական և մեծահոգի է։ Ինչպես «Արմենպրես»-ը տեղեկանում է France 24-ից, այս մասին հայտարարել է Իրանի արտաքին գործերի նախարարության խոսնակ Էսմայիլ Բաղային։
«Մեր պահանջն օրինական է. պատերազմի դադարեցում, (ԱՄՆ) շրջափակման և ծովահենության վերացում, ինչպես նաև ԱՄՆ ճնշման պատճառով բանկերում անարդարացիորեն սառեցված իրանական ակտիվների ապասառեցում», – ասել է Բաղային։
Նա հավելել է, որ Հորմուզի նեղուցով անվտանգ անցումը և տարածաշրջանում ու Լիբանանում անվտանգության հաստատումն Իրանի մյուս պահանջներն էին, որոնք «համարվում են տարածաշրջանային անվտանգությանն ուղղված մեծահոգի և պատասխանատու առաջարկ»։
Al Jazeera-ի փոխանցմամբ՝ Բաղային նաև նշել է, որ անհրաժեշտության դեպքում Իրանը կկռվի։
«Երբ մենք ստիպված լինենք կռվել, մենք կկռվենք, և երբ դիվանագիտության համար հնարավություն լինի, մենք կօգտվենք այդ հնարավորությունից», – նշել է նա։
«Այնուամենայնիվ, դիվանագիտությունն ունի իր սեփական կանոնները։ Որոշումը կհիմնվի մեր ազգային շահերի վրա, և Իրանն ապացուցել է, որ մենք ձգտում ենք պաշտպանել մեր ժողովրդի շահերը», – շեշտել է խոսնակը։
Բաղային նաև հայտարարել է, որ ԱՄՆ-ն շարունակում է «անհիմն պահանջներ» ներկայացնել՝ հավելելով, որ Իրանի արձագանքն ԱՄՆ-ի վերջին առաջարկին, որը Թեհրանը մայիսի 10-ին ուղարկել էր Պակիստանին, «չափից շատ» պահանջներ չէր պարունակում։
Ավելի վաղ Թրամփը մերժել էր հակամարտության ավարտի ուղղված ամերիկյան առաջարկին Իրանի պատասխանը։