Գյումրիի Վարդանանց հրապարակում կայացած մեծ համերգի ընթացքում ՀՀ վարչապետ Նիկոլ Փաշինյանը բեմ հրավիրեց Ֆրանսիայի նախագահ Էմանուել Մակրոնին՝ ընդգծելով նրա բացառիկ դերը հայ-ֆրանսիական հարաբերություններում։
«Այժմ հաճույքով խոսքը փոխանցում եմ Ֆրանսիայի Հանրապետության նախագահ, Հայաստանի Հանրապետության և հայ ժողովրդի մեծ բարեկամ Էմանուել Մակրոնին»,- հայտարարեց Նիկոլ Փաշինյանը։
Բեմ բարձրանալով՝ Ֆրանսիայի նախագահը նախ հայերենով ողջունեց ներկաներին, ապա իր երախտագիտությունը հայտնեց վարչապետին, նվագախմբին, արտիստներին և հրապարակում հավաքված բազմությանը։
«Ցանկանում եմ նաև շնորհակալություն հայտնել ձեզ՝ այն ջերմ ընդունելության համար, որ ինձ արժանացրիք Երևանում և այստեղ՝ Գյումրիում, և իմ ողջ պատվիրակությանը»,- նշեց նախագահ Մակրոնը։
Իր ելույթում Մակրոնն անդրադարձավ Գյումրիի համար ամենածանր ժամանակաշրջանին՝ Սպիտակի կործանարար երկրաշարժին և դրան հաջորդած ֆրանսիական աջակցությանը։
«Ոչ ոք չի մոռացել 1988 թվականի դեկտեմբեր ամիսը, երբ ժամացույցները կանգ առան, երբ ամբողջ քաղաքը քարացավ, և աշխարհը կանգնեց ոտքի քեզ համար, Հայաստա՛ն։ Շառլ Ազնավուրը երգեց, Ֆրանսիան համախմբվեց, 500-ից ավելի հրշեջներ, զինվորականներ, փրկարարներ եկան ձեզ օգնության»,- վերհիշեց Ֆրանսիայի ղեկավարը։
Նա ընդգծեց, որ դժվարություններին հաջորդել է քաղաքի վերածնունդը․
«Եվ Գյումրին վերածնվեց։ Դժոխքից և ձմեռվանից հետո նոր գարուններ եկան»։
Ֆրանսիայի նախագահը շեշտեց, որ քաջատեղյակ է այն մարտահրավերներին, որոնց միջով Հայաստանն անցել է վերջին տարիներին, սակայն լավատեսորեն է տրամադրված երկրի ապագայի հանդեպ.
«Մենք գիտենք բոլոր այն դժվարությունները, որի միջով դուք անցել եք այս վերջին տարիներին։ Եվ քանի Գյումրին այստեղ է, Հայաստանը առաջ է գնում՝ խաղաղությամբ, կայունությամբ՝ Եվրոպայի կողքին»։
Մակրոնը հավաստիացրեց, որ Ֆրանսիան մշտապես կանգնած է եղել և կշարունակի կանգնած մնալ Հայաստանի կողքին՝ թե՛ անցյալի դժվարին պահերին, թե՛ այսօր, թե՛ ապագայում։
«Եվ ինչպես մենք ձեր կողքին էինք 1988 թվականի դեկտեմբերին, այնպես էլ կլինենք հիմա՝ ձեր կողքին»։