Եվրոպական քաղաքական համայնքի երևանյան գագաթնաժողովում Ֆրանսիայի նախագահ Էմանուել Մակրոնը անդրադարձավ ռազմավարական ինքնավարության գաղափարին՝ ընդգծելով, որ այն չի սահմանափակվում միայն անվտանգությամբ կամ էներգետիկայով։
«Մենք պետք է խոսենք տիեզերքի, ինչպես նաև կիսահաղորդիչների մասին, որովհետև անհրաժեշտ է ապահովել կայուն ռազմավարական ինքնավարություն և պաշտպանության ոլորտում, որովհետև երբ մենք խոսում ենք, օրինակ, կիսահաղորդիչների մասին, եթե դու կախվածություն ունես այլ երկրներից, ապա անհրաժեշտ է դիտարկել գլոբալ տնտեսության ինտեգրումը և մեր ամբողջական նորարարական համակարգը, որովհետև մեր ռազմավարական ինքնավարության ձևավորումը պահանջում է շատ ավելի մեծ կենտրոնացվածություն այն հիմնասյուների վրա, որտեղ մենք ունենք գերկախվածություններ։ Եվ, իհարկե, մենք փորձառեցինք այս գերկախվածության արդյունքները Քովիդի ժամանակ, երբ խոսում էինք դիմակների և մի շարք բժշկական միջոցների մասին, ինչպես նաև Ռուսաստանի պատերազմը Ուկրաինայի դեմ բացահայտեց Ռուսաստանի գազից ունեցած գերկախվածությունը»,- ընդգծեց Ֆրանսիայի նախագահը։
Խոսելով անվտանգությունից՝ նա նշեց նաև ԱՄՆ-ի դերի մասին։
«Հիմնական ռիսկերից մեկը, որ ունենք՝ առճակատումների արագացումն է, հատկապես ԱՄՆ-ի և Չինաստանի միջև, ինչը կարող է ավելի արագ բացահայտել այս կախվածությունները, և մենք կհայտնվենք անկյունում։ Կարծում եմ՝ մենք ունենք մի շարք ակտիվներ, առավելություններ, որոնք, ամենայն հավանականությամբ, թերագնահատել ենք, և սրանք հիմնական կապերն են, որոնք աշխարհագրականից անդին են։ Եվ, իսկապես, կարծում եմ, որ ժողովրդավարությանը ուղղված մեր հավատամքը, կանոնների վրա հիմնված աշխարհակարգը, ինչպես նաև բաց և ազատ առևտրի նկատմամբ հարգանքը, կլիմայի փոփոխության նկատմամբ հավատքը, նորարարության և լուծումների միտված մոտեցումներով ավելի հստակեցնում է մեզ և բարձրացնում է մեր կանխորոշելիությունը այս օրակարգին արձագանքելու համար։ Եվ սա շատ լուրջ առավելություն է ի հակադրություն շատ այլ ոչ եվրոպական դերակատարների նկատմամբ, ինչպիսիք են Ծոցի երկրները, ասիական երկրները, լատինամերիկյան և աֆրիկյան երկրները։ Կարծում եմ՝ մենք շատ կարևոր դերակատարում ունենք նաև Հորմուզի նեղուցի հետ կապված իրավիճակում»,- ընդգծեց ֆրանսիացի բարձրաստիճան պաշտոնյան։
Մանրամասները՝ տեսանյութում։