Ամիրյան փողոցը Պապ թագավորի փողոց անվանակոչելու նախագծի քննարկումը հետաձգվեց, քվորում չկար
«Ազգային առաջընթաց» խմբակցության անդամ Հայկ Գրիգորյանը նախագիծ էր ներկայացրել Երևանի Ամիրյան փողոցն անվանափոխելու և Պապ թագավորի փողոց կոչելու վերաբերյալ։
Ավագանու նիստում հարցը միանշանակ չընդունվեց։ Խմբակցությունները դեմ արտահայտվեցին նախագծին։
Նախ հայտարարվեց, որ բերված նախագիծը քննարկված չէ ավագանու խմբակցությունների հետ, մինչդեռ նախկինում առաջարկ է եղել, որ Ամիրյան փողոցի անվանակոչության հարցում պետք է լինի կոնսենսուսային որոշում։
Քաղաքապետ Տիգրան Ավինյանն էլ ասաց․ «Սկի չեմ էլ իմացել ով է այդ մարդը, և երբ մի փորք խորանում ես, հասկանում ես, որ, բացի նրանից, որ ինքը 26 կոմիսարներից մեկն է եղել, գեղեցիկ ազգանուն է ունեցել, այլ ոչ մի արժանիք առանձնապես չունի։ Եվ Երևանի ամենակենտրոնական փողոցներից մեկն իր անունով է անվանակոչված։ Կասկած չունեմ, որ այդ փողոցը վստահորեն պետք է անվանակոչվի»։
Քվորում չլինելու պատճառով նախագիծը չքվեարկվեց։
Ավինյանն առաջարկեց նախագիծը քննարկել մյուս խմբակցությունների հետ և համաձայնություն լինելու դեպքում այն քննարկել առաջիկա նիստերից մեկում։