Հարգելի հայրենակիցներ,
սրտանց շնորհավորում եմ Հայոց բանակի կազմավորման 34-ամյակի կապակցությամբ: Բանակ, որը ստեղծվեց հազարավոր հայորդիների անկոտրում կամքի, բանակաշինության գործի նվիրյալների և հայ ժողովրդի միասնական ջանքերի շնորհիվ ու դարձավ նորանկախ Հայաստանի ամենակարևոր ձեռքբերումներից մեկը:
Հայոց բանակը 1990–ական թվականներից մինչև այսօր անցել է բազմաթիվ փորձությունների միջով, ունեցել է փառավոր հաջողություններ և ցավալի անհաջողություններ։ Եվ այսօր, մեզնից յուրաքանչյուրի ամենօրյա և միասնական աշխատանքի արդյունքն ու սրբազան պարտքը պետք է լինի՝ հետևողականորեն բարձրացնել Հայոց բանակի մարտունակությունը և այն դարձնել ավելի արդիական ու ավելի ուժեղ:
Մեր պետականության կարևորագույն հիմնաքարերն են՝ բանակն ու կրթությունը, և այդ իսկ պատճառով մենք պետք է ունենանք կրթված ու հայրենիքի պաշտպանության համար կազմակերպված ու կարգապահ քաղաքացի։
Տոնական այս օրը մենք խոնարհվում ենք մեր բոլոր այն ազատամարտիկների, կամավորների, զինվորների և սպաների հիշատակի առջև, ովքեր իրենց կյանքը չխնայեցին հանուն հայրենիքի և ժողովրդի։
Հավերժ փա՛ռք նրանց հիշատակին:
Հայոց բանակի 34-ամյա հոբելյանի կապակցությամբ սրտանց շնորհավորում եմ մեր զինվորականներին, երկրապահ կամավորականներին՝ շարքայինից մինչև սպայական կազմ, բոլոր նրանց, ովքեր իրենց ներդրումն են ունեցել հայկական բանակի կազմավորման, նրա կայացման ու հզորացման գործում:
Առանձնահատուկ երախտագիտությունս եմ հայտնում առաջնագծում կանգնած մեր բոլոր տղաներին և մեր թիկնունքն անառիկ պահող հայորդիներին:
Հավերժ փա´ռք քեզ, փառ՛ք քո փառապանծ ուղին կերտած մեր բոլոր հերոսներին՝ ողջ թե նահատակված:
Շնորհավո՛ր տոնդ, Հայոց բանակ։