Անցյալ տարի Ֆրանսիայում գործարանների փակման ցուցանիշն աճել է գրեթե 30%-ով՝ ասիական մրցակիցների կողմից աճող ճնշման և ԱՄՆ-ի մաքսատուրքերի ֆոնին, մինչդեռ նոր բացվող գործարանների թիվը նույնպես նվազել է։ Այս մասին գրում է Bloomberg-ը։
Ֆրանսիայի ֆինանսների նախարարության կիրակի օրը հրապարակած տվյալների համաձայն՝ փակվել է շուրջ 160 գործարան (2024 թվականին՝ 121-ի համեմատ)։ Նախարարությունը նաև նշել է էներգակիրների գների աճի հետևանքների մասին։ Անցյալ տարի բացվել է մոտ 103 գործարան՝ 2024 թվականի 115-ի համեմատ։
Փակման կամ արտադրության զգալի կրճատման հետևանքով առավել տուժած ոլորտների թվում են ագրոպարենային համալիրը, տրանսպորտը, սպառողական ապրանքների արտադրությունը և շինարարությունը։ ArcelorMittal պողպատագործական ընկերությունից մինչև ավտոպահեստամասերի մատակարար Valeo-ն՝ ընկերությունները փակվում են պահանջարկի անկումից հետո։
«Միջազգային իրավիճակի վատթարացումը ծանր բեռ է դառնում», – նշվում է նախարարության զեկույցում։
Անցյալ տարի ArcelorMittal-ը հայտարարել էր, որ կկրճատի մոտ 600 աշխատատեղ Ֆրանսիայի հյուսիսում գտնվող յոթ ձեռնարկություններում՝ եվրոպական պողպատագործական արդյունաբերությունում պահանջարկի նվազման ֆոնին։ Քիմիական Arkema ընկերությունը նույնպես կրճատել է իր գործունեության մի մասը երկրի տարածքում գտնվող իր ձեռնարկություններից մեկում։
2024 թվականի վերջում Valeo-ն, հայտարարելով Ֆրանսիայում երկու գործարան փակելու ծրագրերի մասին, հղում էր արել ավտոմոբիլային արդյունաբերության մռայլ հեռանկարներին և ավելի էժան չինական արտադրանքի կողմից մրցակցությանը։